"Dancing Zhetysu" - Dál osyndaı ataýmen Almaty oblysynda tyń joba qolǵa alyndy, - dep habarlaıdy Qamshy.kz aqparat agenttigi.
Elbasynyń "Bolashaqqa baǵdar: rýhanı jańǵyrý" maqalasy jaryq kórgeli oblys aýmaǵynda ilkimdi ister atqarylyp keledi. Ásirese, ulttyq bı ónerin týrızm salasymen ushtastyra otyryp, tabıǵattyń tańǵajaıyp týyndylaryn tamashalaýǵa múmkindik beretin jańa Dancing Zhetysu kópshilikti qyzyqtyryp jatyr.
Jetisý jeriniń tumsa tabıǵattyń álemge tanytý ári týrızm salasyna jańasha baǵdar berý maqsatynda qolǵa alynǵan joba týraly avtor Ádilbek Abılov baspasóz-konferensıasynda jan-jaqty baıandap berdi. Onyń aıtýynsha, atalmysh jobaǵa oblystyq óńirlik komýnıkasıalar qyzmeti men "Taldyqorǵan áýenderi" fólklorlyq-etnografıalyq án-bı ansambliniń myń buralǵan bıshileri qatysqan. Olar Jetisýdyń Kólsaı, Sharyn, Qaıyndy, Altyn Emel syndy kórikti jerlerinde arnaıy túsirilim jasaǵan.
Kelesi túsirilimder totydaıyn taranyp, kún saıyn qulpyryp kele jatqan Taldyqorǵan qalasynyń kórikti jerlerinde iske aspaq.
"Eń alǵash usynys túskende zor jaýapkershilik júgin arqalaý ońaı bolmady. Alaıda jetisýlyq belsendi jastardyń el múddesin oılap, osyndaı tyń joba oılap tapqandaryna az da bolsa óz úlesimdi qosýdy paryzym sanadym. Maǵan tabıǵat aıasynda bılegen óte qatty unady. Bul tek meni ǵana emes, sonymen qatar áriptesterimdi de shabyttandyra tústi. Nebári tórt kúnge sozylǵan túsirilim qyzyqty ótti. Jumys barysy da esh qıyndyq týǵyzǵan joq. Sebebi, óz kásibin jaqsy meńgergen bilikti mamandarmen tyǵyz baılanysta jumys jasadyq. Al osy jobaǵa daıyndalǵan bıimizdi shyǵarý úshin kóp ter tóktik. Bı Jetisý ólkesiniń ár jerinde bılenetindikten, oǵan saı kostúm men qoıylymnyń saı kelýi basty orynda turdy jáne árbir is-qımylda ózindik syr jatyr desek te bolady. Osymen birge, jalpy jobanyń uıymdastyrýshysy men qoldaý kórsetken Almaty oblystyq ishki saıasat basqarmasyna alǵysymyz sheksiz", - deıdi "Taldyqorǵan áýenderi" fólklorlyq-etnografıalyq ansambliniń bıshisi Sara Qaıyrjanova.
Aldaǵy ýaqytta eki ujym birlesip júıeli jumys jasamaq nıette. "Zamanyń túlki bolsa tazy bop shal" degendeı, jastardyń jarqyn bolashaqqa jasaǵan jobasy kópshilik kóńilinen shyǵady degen oıdamyz.
