Almatynyń tarıhı ortalyǵynyń úshten birin qaıta jasaý jumystary jalǵasyp jatyr, - dep habarlaıdy Qamshy.kz aqparat agenttigi.
Almaty ákimi Baýyrjan Baıbek kezekti jumys sapary aıasynda jaıaý júrginshige basymdyq beretin Qabanbaı batyr, Panfılov, Jibek joly, Gogol kósheleri men "Astana" alańyn qaıta jańǵyrtýdyń barysyn tekserdi. Almatynyń tarıhı ortalyǵynyń úshten birin qaıta jasaý, qalanyń joldary men ınjenerlik jelilerin salý men jóndeý jergilikti kásiporyndardyń júktemesin qamtamasyz etip, 43 myń jumys ornyn qurýǵa yqpal etti.
Baspasóz qyzmetiniń málimetinshe, megapolıs basshysyna atalǵan ýchaskelerde ınjenerlik jelilerdiń aýystyrylǵany, ǵımarat syrtynyń jańarǵany, biryńǵaı stıldiń engizilgeni, granıt tastardyń tóselgeni baıandaldy.
Sondaı-aq, ákimdiktegilerdiń aıtýynsha, Qabanbaı batyr kóshesiniń eki jaǵynan Tólebaev pen Abylaıhan kósheleriniń arasyna birneshe kún ishinde tas tóseý jumystary aıaqtalady. Gogol kóshesi boıynda jasyl jelekti sýaratyn júıe tartylýda, Qaldaıaqov pen Jeltoqsan kósheleriniń arasyna tas tóseý qyrkúıektiń basynda iske asady. "Astana" alańynda qozǵalys jolaǵy azaıǵan, qurǵaq fontandardy montajdaý jumystary júrip jatyr, tas tóseý de aıaqtalyp qaldy. Alań qyrkúıek aıynyń basynda ashylady.
Ákimniń baspasóz qyzmetindegiler Almaty ákimi júrginshi trotýarlaryna tegis, sapaly ári ekologıalyq taza granıt plıtkalardy tóseý, jaıly kóshe jıhazdaryn qoıý, túrli aǵashtardy otyrǵyzý, aryqtardan sý aǵyzý, kóliktiń bolmaýy, retsiz jasalǵan jarnamanyń, syrty ábden eskirgen fasadtardyń joıylýy qala ortalyǵyn barynsha jaıly ári tanymal etetinin atap ótti.
Jalpy, jańa tas tóselgen, oryndyqtar, kishi pishindi arhıtektýralyq formalar qoıylǵan, jaryq kózderi ornatylǵan, jasyl jelekpen kómkerilgen, demalys aımaqtary, balalar alańdary, velojoldary jasalǵan barlyq obektiler 16 qyrkúıekte daıyn bolady dep josparlanǵan. Atap óterlik jaıt, mamandar aǵash otyrǵyzýdy kúz mezgilinde bastaý týraly sheshim qabyldaǵan. Bular tamyr jaıǵan aǵashtar: qaıyń, terek jáne basqalary. Barlyǵy 330 myń m2. jasyldandyrylady.
Ákimdiktiń málimetinshe, qalada barlyq magıstraldy kóshelerdegi joldarǵa ortasha jóndeý jumystaryn júrgizý aıaqtaldy. Qyrkúıektiń basynda Asqarov kóshesiniń boıyndaǵy sý qubyrlaryn jáne Qazybek bı, Mametova , Masanchı kósheleriniń boıyndaǵy ýchaskelerde jylý júıelerin qaıta jasaý jumystary qyrkúıekte aıaqtalady. Sonymen qatar, 14,7 shaqyrym aryq jelileri, 57 kóshedegi 42,2 shaqyrym aryq júıeleri qaıta jasalýda.
Jyl aıaǵyna deıin 102 ótpeli jolǵa jaryq túsirilip, olar qaıta jańarady. Bıyl ár aýdanda 472 jańa aýla alańdary, ekiden júrginshi aımaqtary paıda bolady.
