Bilim berý salasy qyzmetkerleriniń tamyzdaǵy keńesi kezinde Almaty ákimi Baýyrjan Baıbek tabysty adamnyń qandaı bolýy kerektigi jaıynda sóz qozǵady.
"Tabysty adamda úsh nárse bolýy kerek: ol bilimdi, tárbıeli jáne deni saý bolýy kerek. Densaýlyq bolmasa, qalǵanynyń keregi joq. Sondyqtan balalarymyzdy jastaıynan denin saý ustaýǵa úıretýimiz kerek. Velosıped sportyn qoldaıtynymyzdy bilesizder. Japonıalyq bir fılosof keıbireýler júgirýdi bireýden qashý dep oılaıdy dep aıtqan. Joq biz qartaıǵanda saý bolý úshin júgiremiz. 40 jastan asqanda adam kúshinen aıyrylyp, semip qalady. Al sportpen shuǵyldansa, 60, 70 jáne 80 jasqa deıin qýatty bolady. Balalardy osyǵan baýlýymyz kerek", - deıdi Almaty basshysy.
Baıbektiń sózinshe, balalardyń densaýlyǵy adamdardyń óz qolynda.
"Qazirgi kezde olar az qozǵalyp, teledıdar aldynda, partada kóp otyrady. Sondyqtan 1 qyrkúıekten bastap naqty shaaralar qoldaný kerek. Omyrtqanyń qısaıýy, kórý qabiletiniń nasharlaýy jáne basqalary - munyń bári bilim sapasyna áser etedi. Jalpylaı alǵanda bizdiń barlyq josparlarymyzǵa qarjy bólingen", - deıdi Baıbek.
Qala basshysynyń aıtýynsha, qala búdjetiniń besten bir bóligi - 86,4 mıllıard teńge bilim berýge baǵyttalǵan.
"Bıyl qala mektepterin zamanaýı fızıka, hımıa, bıologıa, lıngafondy mýltımedıalyq kabınettermen 100 paıyz jabyqtadyq. Bul maqsatta qala búdjetinen 1,4 mıllıard teńge bólindi. Oqýlyqtar satyp alýǵa - 2 mıllıard teńge. Jyl saıyn jańa mektepter men balabaqshalar ashylyp jatyr. Biz ınfraqurylym jasap úlgermeı jatyrmyz, halyq sany artyp, mektep pen balabaqshadaǵy oryndardyń jetispeýshiligi bar, sondyqtan bul máselelerdi keshendi sheshýimiz qajet", - dedi Baıbek.
Bıylǵy jyldan bastap Almatyda 33 mektep jańa júıede jumys isteıtin bolady. Onda fızıka, bıologıa, hımıa, ınformatıka pánderi aǵylshyn tilinde júrgizedi. Pılottyq joba aldaǵy eki jylda júzege aspaq. Bul týraly jyl saıynǵy tamyz keńesinde málim boldy. Joba ozyq tehnologıalardy meńgere alatyn, jańasha oılaı biletin azamattardy tárbıeleýge yqpal etpek. Osy rette bıylǵy jylǵy ulttyq birińǵaı testileý qorytyndysy boıynsha Almaty taǵy da kósh bastap tur.
Bıylǵy jyly qaladaǵy 123 mektep symsyz WI-FI jelisine qosylady. Qyrkúıek aıynyń aıaǵyna deıin iske qosylatyn jobaǵa qala qazynasynan 175 mln teńge jumsaldy. Jalpy mektepterdiń zamanaýı jabdyqtarmen qamtylýyna bıylǵy jyly 1,4 mlrd teńge qarastyrylyp, jylpy bilim salasyna 63,4 mlrd teńge bólingen. Al jańa formatta ótken ulttyq birińǵaı testileýden osy jyly Almaty oqýshylary 97,5 balmen respýblıka boıynsha joǵary kórsetkishterge jetti. Bilim salasynda budan ózge de jetistikter artyp jyǵylady.
«2017-2018 jylǵy oqý jylynan bastap QR Bilim jáne ǵylym mınıstrliginiń tapsyrmasy boıynsha, Almaty qalasynda birneshe pılottyq mektepterdiń bazasynda 5-pen 7-shi synyptarda jalpy kólemi 20 saǵattan turatyn Ólketaný kiriktirilgen kýrsy júrgiziletin bolady. Atalǵan kýrs geografıa, qazaq tili, qazaq ábedıeti, Qazaqstan tarıhy, mýzyka pánderiniń aıasynda oqytylady», - dedi Bilim berý basqarmasynyń basshysy Rahat SHIMASHEVA.
Odan ózge, aldaǵy eki jylda 7000-nan astam orynǵa 54 balabaqsha tek jeke ınvestorlardyń qarjysy esebinen turǵyzylady. Onyń ishinde 3000-ǵa jýyq orynǵa arnalǵan 24 balabaqsha memlekettik menshikke beriletin bolady. Ol 23,6 mlrd. teńge memleket qarjysyn únemdeýge múmkindik beredi. Bul da qalamyzdaǵy bıznestiń joǵary áleýmettik jaýapkershiliginiń jarqyn kórinisi, dedi ákim.
«Qazirgi tańda bilimdi damytýǵa memlekettik qarjymen qatar jeke ınvestorlardyń kóptep úles qosýy da osy «Týǵan jer» baǵdarlamasynyń basty baǵyttarymen astasyp jatyr. Bul úrdis bizdiń qalamyzda keń óris alýda. Mysaly, ótken oqý jylynda «Koktem GROUP LTD» kompanıasynyń qarjysyna Medeý aýdanynda №168 qazaq mektebi men úlken qazaq balabaqshasy ashyldy. Olarǵa Elbasy ózi baryp tanysyp, joǵary baǵasyn berdi. Al, jańa oqý jylynda Naýryzbaı aýdanynda «Sábı» qaıyrymdylyq qorynyń qoldaýymen salynǵan 1200 orynǵa arnalǵan jańa mektep balalarǵa esigin ashpaq», - dedi Almaty qalasynyń ákimi Baýyrjan BAIBEK.
Jyl saıyn qalada daryndy jáne shyǵarmashyl ustazdardy qoldaýǵa baǵyttalǵan baıqaý uıymdastyrylady. Bıylǵy jyly qalalyq úzdik pedagogıkalyq ujym konkýrsynda Jambyl Jabaev atyndaǵy № 161 lıseı jeńimpaz atandy. Bul maqsattarǵa qala qazynasynan 100 mln teńge bólingen.
