"Qyz alyp qashý" degen jabaıy ǵurypty joıý úshin ár qazaq otbasy ulyna munyń 21-ǵasyrda "adam urlaý" dep atalatyn aýyr qylmys ekenin uqtyrýy kerek. Al qyzyna osyǵan uqsas qandaı da bir jaǵdaıǵa ushyrasa, esh qobaljymaı, órekpigen topty aldarqatyp dereý úıimen habarlasýyn, sosyn basyna otyz oramal baılap, qyryq tabaldyryqtan attatsa da, adyraspan jaǵyp, jolyna kempirler kóldeneń jatyp alsa da, ondaı ortaǵasyrlyq salttyń zań turǵysynan jeke bas statýsyn esh ózgertpeıtinin eskerte berýi lázim.

Dál osy máselege qatysty "El ne deıdi?" degen komplekstiń postsovettik býynnyń boıynda bolmaýy tıistigin túsindirý qajet. Qyz balaǵa óz erkinen tys qandaı da bir alyp qashý oqıǵasynyń ortasynda qalsa, sol úıdegi es-aqyly durys úlken adamdarǵa sabyrmen ǵana ynjyq uldarynyń sottalyp ketýi múmkin ekenin aıtyp, týystarymen jáne zań oryndarymen dereý baılanysqa shyǵýdy talap etip turyp alýyn uǵyndyrý kerek. Jylamaı-syqtamaı, qasaqana sazarǵan túrmen. Alyp qashqan jigitten bólek mundaı "qoldy bolǵan qalyńdyqtardyń" obalyna qalatyndar - "ózimiz de óstip kelin bop túskenbiz" dep sóıleıtin, óz tragedıasyn endi jańa qurbannyń boıynan kórgisi kelip janyn jubatýǵa qushtar adamdar.

Qurbandar sanyn kóbeıte túsetin jáne bir úlken faktor - "esik kórip qoıdym, basyma jaýlyq túsip ketti" dep eskishe oılaıtyn qyz balanyń qorqynyshy. Bul qorqynyshty seıiltýdiń jolyn joǵaryda aıttym. "El ne dese, o desin! Odan mahabbatymyz bir mysqal kemimeıdi. Júregimizdiń tórindegi, kóńilimizdiń kógindegi juldyzymyzsyń. Óz taǵdyryńa óziń ıe táýelsiz tulǵasyń, zaıyrly eldiń azamatysyń" dep ósirý kerek qyz balany.

Jazba Ǵalym Boqashtyń Facebook paraqshasynan alyndy.