Qazaqstan Respýblıkasynyń Memleketttik hatshysy Almatyǵa jasaǵan jumys sapary aıasynda qalanyń birqatar mádenı nysandarynda boldy, dep habarlaıdy Qamshy.kz aqparat agenttigi Almaty qalasy ákimdiginiń baspasóz qyzmetine silteme jasap. Gúlshara Ábdihalyqova 1931-1933 jyldardaǵy asharshylyq qurbandarynyń eskertkishine gúl shoqtaryn qoıdy, sonymen qatar Almaty Murajaıynyń ekspozısıalarymen tanysty.
QR Memlekettik hatshysy Almaty ákimimen birge «Rýhanı jańǵyrý» baǵdarlamasy aıasynda bıylǵy jyldyń mamyr aıynda Qaraǵaıly skverinde asharshylyq jyldarynyń qurbandaryna ornatylǵan eskertkishke gúl shoqtaryn qoıdy. Qola men granıtten quıylǵan tórt metrlik monýment balasyn keýdesine qysqan ana skýlptýrasyn beıneleıdi.
Gúlshara Ábdihalyqova qalanyń 1000 jyldyǵy merekesi aıasynda ashylǵan Almaty Murajaıynyń ekspozısıalarymen tanysty. Murajaı megapolıstiń iri ǵylymı jáne mádenı ortalyǵy bolyp tabylady, munda óńirdiń tarıhı-mádenı murasynyń barlyq spektri kórinis tapqan. Murajaı koleksıasy 40 myńǵa jýyq eksponattardan turady, olardyń arasynda kórkemóner shyǵarmalary, qazaq etnografıasynyń qundy jıyntyǵy, túrli dáýirdegi turmystyq zattar koleksıasy, nýmızmatıka jáne basqalary bar.
QR Memlekettik hatshysy dál osy kúni «Qala kúni» men «Astana EHRO-2017» halyqaralyq kórmesine oraılastyrylǵan halyqaralyq «Almaty Kok-Tobe Opera – 2017» festıvaline qatysady. Festıvál sahnasynda Abaı atyndaǵy memlekettik opera jáne balet teatry sımfonıalyq orkestriniń súıemeldeýimen qazaqstandyq úzdik solıser men álemdik opera jáne balet juldyzdary óner kórsetedi.
Bulardan ózge, Gúlshara Ábdihalyqova jańartylǵan «Sulýshash» pannosynyń ashylýyna qatysady. Sýretshi Moldahmet Kenbaev pen monýmentalıs Nıkolaı Sıvchınskıı jasaǵan qolyna ulttyq zergerlik buıymdardy taqqan qyz beınesi 70-shi jyldary Dostyq dańǵylynyń boıyndaǵy bir úıdiń qabyrǵasyna qoıylǵan bolatyn. Sýretshiniń uly Alpamys Kenbaevtyń arqasynda Almaty qalasyny ákimdiginiń qoldaýymen panno smaltadan qaıta jasalyp, Almatynyń eń kórikti jeri – Kóktóbege qoıyldy.
