Qazaqstanda alǵash ret Til festıvali aıasynda uıymdastyrylǵan halyqaralyq Jaıdarman oıyny óz máresine jetip, Qyrǵyzstan quramasy jeńimpaz atandy dep habarlaıdy Qamshy.kz.
Sharany QR Mádenıet jáne sport mınıstrligi Tilderdi damytý jáne qoǵamdyq-saıası jumys komıtetiniń qoldaýymen Sh. Shaıahmetov atyndaǵy tilderdi damytýdyń respýblıkalyq úılestirý-ádistemelik ortalyǵy jáne Qazaqstan KVN Odaǵy uıymdastyrǵan bolatyn.
Qyrǵyzstan, Tatarstan, Bashqurtstan elderinen jáne Qazaqstandyq birneshe toptar óner kórsetken saıys joǵary deńgeıde ótti. Buryn Jaıdarmannyń ishki birinshiligine qatysyp, tájirıbe jınaǵan qyrǵyzstandyqtar oıynǵa tyńǵylyqty daıyndyqpen kelip, bas júldemen qosa 500 000 teńge aqshalaı syılyqty ıemdendi. İ oryn men 350 000 teńgeni qazylar alqasy biraýyzdan «Tatarstan quramasyna» berse, İİ oryn alǵan Bashqurtstannan kelgen komandaǵa 300 000 teńge aqshalaı syılyq buıyrdy. Al İİİ oryn men 150 000 teńge eki komandaǵa - Torǵaı óńiriniń namysyn qorǵap kelgen «Arý.kz» toby men «OQO quramasyna» berildi.
Sondaı-aq Halyqaralyq túrki akademıasynyń prezıdenti Darhan Qydyráli akademıa atynan jarkenttik uıǵyr jastarynan quralǵan «Lagman.com» toby men túrkistandyq ózbekter quramasy «Iassy» tobyna 250 000 teńge arnaıy aqshalaı syılyq usyndy.
Satırık Kópen Ámirbek bastaǵan qazylar alqasy quramynda halyqaralyq Túrki akademıasynyń prezıdenti, «Egemen Qazaqstan» respýblıkalyq gazeti» AQ Basqarma tóraǵasy Darhan Qydyráli, QR Investısıalar jáne damý mınıstrligi qoǵammen baılanys bóliminiń meńgerýshisi Berik Ýálı, «Respýblıkalyq radıolar» JSHS dırektory Mádı Manatbek, akter Núrken Óteýilov oıynǵa tórelik etti.
Oıyn sońynda jalyndy joldarymen sóz alǵan Memleket jáne qoǵam qaıratkeri Orazkúl Asanǵazyqyzy jastardyń ana tiline degen súıispenshiligin arttyrýǵa, patrıottyq sezimin oıatyp, rýhty sózderimen qasıetti tilimizdiń mártebesin kóterýge shaqyrdy. Dıplom jáne aqshalaı syılyqtardy QR Mádenıet jáne sport mınıstrligi Tilderdi damytý jáne qoǵamdyq-saıası jumys komıteti Tóraǵasynyń m.a. Ǵalymjan Sársenbaıuly jeńimpazdarǵa tabystap, quttyqtaý sózimen oıyndy qorytyndylady.
Oıyndy «Qazaqstan» ulttyq arnasynan kórsetý josparlanyp otyr.
