Parlament palatalary músheleriniń aldynda sóz sóılegen Qazaqstan Prezıdenti depýtattardyń ótken sesıadaǵy qyzmet nátıjelerine toqtalyp, elimizdegi reformalardy zańnamalyq turǵydan qamtamasyz etý jónindegi jumystardy jalǵastyrýdyń mańyzdylyǵyn atap ótti dep habarlaıdy Qamshy.kz aqparat agenttigi Aqorda baspasóz qyzmetine silteme jasaı otyryp.

– Ótken sesıada Parlament 84 zań jobasyn qarap, qabyldady. Sonyń ishinde «Qazaqstan Respýblıkasynyń Konstıtýsıasyna ózgerister men tolyqtyrýlar engizý týraly» zań da bar. Bir jylda sizderdiń bastamalaryńyzben 15 zań jobasy ázirlendi, – dedi Elbasy.

Nursultan Nazarbaev júrgizilgen saıası reformalardyń nátıjelerine nazar aýdaryp, búkil memlekettik apparattyń aldyna qoıylǵan mindetterdi iske asyrýda Parlament pen Úkimettiń jaýapkershiligi joǵary ekenin aıtty.

– Qazaqstan búginde strategıalyq mańyzy bar birqatar mindetti júzege asyrýda. Parlament Úkimetpen birlesip, Ult josparyn, Joldaýdy jáne qoldanystaǵy baǵdarlamalardy oryndaý úshin barlyq sharalardy qabyldaýy qajet, – dedi Memleket basshysy.

Qazaqstan Prezıdenti qoǵamdy damytýdyń jekelegen baǵyttaryna toqtaldy. Elbasy rýhanı jańǵyrý jáne ekonomıkalyq ósimdi qamtamasyz etý jónindegi mindetterdiń oryndalýyna nazar aýdardy.

– Bıyl Parlamenttiń qaraýyna jańa Salyq kodeksiniń jobasy engiziledi. Biz salyq saıasatyn meılinshe jaqsartyp, bıznesti ashyq jumys jasaýǵa yntalandyrýǵa tıispiz. Arnaıy ekonomıkalyq jáne ındýstrıalyq aımaqtar jónindegi zańnamany jetildirý kerek. Sondaı-aq, bankterge tıimdi baqylaý júrgizý úshin Ulttyq bankke zańnamalyq turǵydan kóbirek múmkindik berý qajet, – dedi Nursultan Nazarbaev.

Sonymen birge, Memleket basshysy saqtandyrý júıesin damytý jáne dári-dármek aınalymyn tártipke keltirý, sondaı-aq elimizdiń aqparattyq qaýipsizdigin qamtamasyz etý jáne quqyq qorǵaý júıesin reformalaý máseleleriniń mańyzdylyǵyn atap ótti.

– Parlamenttiń jáne búkil elimizdiń aldynda jaýapkershiligi mol kóp jumys bar. Aýqymdy mindetter men sheshimder – bizdiń 2017 jylǵy jahandyq syn-qaterlerge jaýabymyz. Jańǵyrý barlyq kúshimizdi jumyldyrýdy qajet etedi. Jańa jaǵdaıda bıliktiń zań shyǵarý jáne atqarýshy tarmaqtary syndarly túrde yntymaqtasýǵa tıis, – dedi Qazaqstan Prezıdenti.

Memleket basshysynyń Parlamenttiń úshinshi sesıasynyń ashylýynda sóılegen sóziniń tolyq mátinin myna jerden qarańyz.