Astana qalasynda EKSPO-2017 kórmesiniń mádenı baǵdarlama aıasynda osymen toǵyzynshy ret Bıbigúl Tólegenovanyń halyqaralyq vokalıster konkýrsy ótpek. Halyqaralyq vokalıster konkýrsy jastarymyzdyń nazaryn klasıkalyq jáne halyq mýzykasyna tartýdy maqsat etedi. Konkýrs daryndy jas oryndaýshylardyń bedelin asqaqtatyp, jastarymyzdyń rýhanı damýyna septigin tıgizbek. Qazaq mýzykasynyń tańdaýly úlgilerin oryndaý mádenıetin qaıta jańǵyrtyp, Qazaqstan kompozıtorlary shyǵarmalaryn dáripteýde qyzmet atqarady.

İrikteý jáne aqtyq kezeń 2017 jyldyń 5 qyrkúıeginen bastap, 10 qyrkúıegine deıingi aralyqta Qazaqstan Respýblıkasy Qarýly kúshteriniń Ulttyq áskerı-patrıottyq ortalyǵynda ótedi. Saltanatty ashylý sharasy 2017 jyly 5 qyrkúıek kúni saǵat 18-30-da Astana qalasy ákimdiginiń Memlekettik Akademıalyq fılarmonıasynyń Astana konsert zalynda bolady. Konkýrstyń jabylýy jáne jeńimpazdardy marapattaý saltanaty 2017 jyldyń 10 qyrkúıeginde «Qazaqstan» OKZ sahnasynda, saǵat 18-30-da bastalady.

Qazaqstannyń túkpir-túkpirinen, taıaý jáne alys shet elderden opera óneriniń has talanttary jınalady. Bıbigúl Tólegenovanyń IX halyqaralyq vokalıster konkýrsy Astana turǵyndary men qonaqtary úshin erekshe konsert uıymdastyrmaq. Konkýrsqa 1985 jyly 1 qazannan erte emes jáne 1998 jyly 1 qazannan kesh emes týylǵan ánshi qyz-jigitter qatysa alady. Konkýrstyq synaq irikteý jáne aqtyq kezeńderinen turady. Barlyq tyńdaýlar kópshilik aldynda ótkiziledi. Óner kórsetý tártibi jerebe tastaý arqyly anyqtalyp, konkýrs sońyna deıin saqtalady. Aqtyq týrǵa 12-14 ónerpaz qatystyrylady. Konkýrsqa qatysýshylardyń ónerin bedeldi ári kásibı qazylar alqasy baǵalaıdy. Konkýrstyń qazylar tóraǵasy – KSRO halyq artısi, Sosıalısik eńbek eri, KSRO jáne Qazaqstannyń Memlekettik syılyq laýreaty, akademık Bıbigúl Tólegenova.

Qazylar quramyna Bıbigúl Tólegenovanyń I-VIII halyqaralyq vokalıster konkýrsynyń bas júlde ıegerleri men laýreattary kiredi:

1. Talǵat Musabaev – Qazaqstan Respýblıkasynyń Eńbek sińgen qaıratkeri , «Astana opera» opera jáne balet teatrynyń jetekshi solısi, Halyqaralyq konkýrstar laýreaty, Qazaqstan Respýblıkasy, Astana q.;
2. Karımova Alfıa – Bashqurtstan Respýblıkasynyń Eńbek sińgen artısi, «Astana opera» opera jáne balet teatrynyń jetekshi solısi, Halyqaralyq konkýrstar laýreaty, Qazaqstan Respýblıkasy, Astana q.;
3. Jelturǵyzov Azamat – Qazaqstan Respýblıkasynyń Eńbek sińgen qaıratkeri, Halyqaralyq konkýrstar laýreaty, Astana qalasy ákiminiń Memlekettik Akademıalyq fılarmonıasynyń solısi, Qazaq UÓÝ «Vokal óneri jáne hordy dırıjırlik etý» kafedrasynyń profesory.
4. Baıǵojın Súndet – Qazaqstan Respýblıkasynyń Eńbek sińgen qaıratkeri, Halyqaralyq konkýrstar laýreaty, «Astana opera» opera jáne balet teatrynyń jetekshi solısi, Qazaqstan Respýblıkasy, Astana q;
5. Ramız Ýsmanov – Ózbekstannyń halyq ártisi, Halyqaralyq konkýrstar laýreaty, A.Navoı atyndaǵy MAÚT solısi, Ózbekstan, Tashkent q.;
6. Hamzına Dına – Qazaqstan Respýblıkasynyń Eńbek sińgen qaıratkeri, Halyqaralyq konkýrstar laýreaty, «Astana opera» opera jáne balet teatrynyń jetekshi solısi, Qazaqstan Respýblıkasy, Astana q;

Konkýrstyń jaýapty hatshysy: Rýzavına Raısa – Reseı Mádenıetiniń eńbek sińirgen qyzmetkeri, Reseı, Máskeý q.;

Jas ánshileriniń óner kórsetýin halyqaralyq qazylar alqasy baǵalaıdy jáne árbir qatysýshy óner kórsetýiniń shyǵarmashylyq taldaýyn, sondaı-aq, kásibı mamandardyń usynystaryn alady. Konkýrstyń negizgi uıymdastyrýshysy – Qazaqstan Respýblıkasynyń Mádenıet jáne sport mınıstrligi, sondaı-aq, «Mıras» Mádenıettiń qoǵamdyq ulttyq qory» Qoǵamdyq qory.