Óńirlerdiń áleý­met­tik-ekonomıkalyq da­mýy jáne memlekettik baǵdar­la­ma­lardyń iske asyrylýy bo­ıyn­sha Kókshe tórinde ótken keleli keńeste Elbasy Nur­sultan Nazarbaev ákimder­diń aldyna birqatar másele­lerdi qoıǵan bolatyn. Osyǵan oraı ákimdikte arnaıy jıyn ótip, oblys ákimi Amandyq Batalov oblystyq basqar­malar men departament­terdiń basshylaryna, aýdan, qala ákimderine birneshe tapsyrma berdi.

– Bıylǵy jyldyń ótken  7 aıynyń áleýmettik-ekono­mıkalyq damý qorytyndysy shyǵaryldy. Bizdiń aldy­myz­da birneshe mańyzdy tap­syr­ma tur. Memlekettik «Nurly jer» jáne «Nurly jol» baǵ­dar­lamalarynyń oryndalýy Elbasynyń erekshe baqy­la­ýyn­da. Sol sebepti, osy jáne ózge de baǵyttar boıynsha jumystardy qarqyndy júr­gizý qajet. Memlekettik-jeke­menshik áriptestik mehanızm­derin qoldaný máselesindegi, sonyń ishinde densaýlyq saq­taý salasynda osy mehanızm­di qoldanýda belsendi jumys­tar júrgizýimiz kerek.Óńirge ınvestısıa tartý da erekshe nazarda. Sondyqtan da, aýdan, qala ákimderi men basqarma jáne departament basshy­lary­na osy atalǵan tapsyr­malardy oryndaýda úlken jaýapker­shilik tanytýyn su­raı­myn. Atalǵan baǵyttar­dyń oryn­dalýy árbirińizdiń atqarǵan jumystaryńyzdyń aıqyn kór­­setkishi bolyp ta­by­lady, – dedi oblys bas­shysy.

Jıyn barysynda oblys ákimi «Rýhanı jańǵyrý» baǵ­dar­lamasyn oryndaýǵa erekshe nazar aýdarý qajettigin de atap ótti.

Amandyq Ǵabbasuly ob­lys­tyq ishki saıasat basqarma­synyń basshysy men osy sala­ǵa jetekshilik etetin oryn­basaryna:

– Oblysta «Rýhanı jań­ǵy­rý» baǵdarlamasyn iske asy­rý baǵytynda qolǵa alynǵan jumys­tardy jandandyrý qa­jet. Bizde kóp múmkinshilikter bar, alaıda belsendilik tanytý jaǵy aqsap tur. İstelip jatqan jumystaryńyzda naqtylyq baıqalmaıdy. Jańasha kóz­qaraspen qarap, tıisti sharalar qabyldańyzdar, – deı kele «Rýhanı jańǵyrý» baǵdar­lamasyn júzege asyrý maqsa­tynda arnaıy ashylǵan Taldy­qorǵan qalasyndaǵy oblystyq  jobalyq keńse jumysyn qaıta qarap shyǵýdy tapsyrdy.

Jalpy oblysymyzda «Rý­­ha­­nı jańǵyrý» baǵdar­lamasy boıynsha  108 joba jasalyp, júzege asýda. Onyń ishinde «Týǵan jer», «Ata­meken» ba­ǵy­ty boıynsha 21 jobany iske asyrý kóz­delip otyr. Onyń eń irisi Eńbek­shi­qazaq, Kerbulaq aý­dan­daryn­da júze­ge aspaq. Elbasynyń úndeýin qoldaǵan osy aýdan­nyń kásip­kerleri óz basta­malarymen mádenıet jáne demalys saıa­baq­taryn qor­shap, qosymsha bilim berý ortalyqtaryn ashýdy, kom­pú­terlik saýat­tylyq, aǵyl­shyn tili boıyn­sha jastar­dyń bilimin art­tyrý­dy kóz­dep otyr. Sony­men qatar úlken bir joba Qarasaı aýda­nynda júzege asyp, qyrkúıek aıy­nyń ba­syn­da «Batyr ba­ba­lar» atty mýzeı-kesheni ashylmaq. Jyl sońyna deıin júzege asatyn 21 jobaǵa ke­te­tin qara­jat 2 mlrd. teńgeni qurap otyr.

Qolǵa alynatyn taǵy bir joba – Talhız, Qoılyq syn­dy kóne qalalar men Bes­shatyr qorymyna arheolo­gıalyq qaz­balar júrgizip, aspanasty mýzeıine aınal­dyrý. Bul bo­ıyn­sha búginde qujattandyrý jumystary  júrgizilýde.

«Rýhanı jańǵyrý» baǵ­darlamasy boıynsha jumys­tardy saralaǵan oblys bas­shysy áli de jobalardy je­til­­dirý, balalar úshin jańa dú­­nıe­ler oılap taýyp, aýla­lar­dy halyqtyń sanasynyń jań­ǵyrýyna áser etetindeı qazaqy úlgide sándeý syndy ózgeshe izdenistiń qajettigin atap ótti. Aýdan ákimderine de osy iske aıryqsha mán berýdi tapsyrdy. Atalmysh baǵdar­lama boıynsha qarajat kóle­mi keler jyly 1 mlrd. teńge­ge ulǵaıtylatynyn da jet­kizdi.

Alma ESENBAEVA