Mádenıet jáne sport mınıstrligi qoǵamdyq mańyzy bar ádebıetti satyp alý maqsatynda buryn basylyp shyǵarylmaǵan ádebıetti irikteý júrgize bastaǵanyn jarıa etti. İrikteýge qatysý maqsatynda avtor (avtorlar) nemese onyń senimhaty boıynsha ókili óziniń ádebıetin mádenıet salasyndaǵy ýákiletti organǵa usyna alady dep habarlaıdy Qamshy.kz aqparat agenttigi Mádenıet jáne sport mınıstrliginiń baspasóz qyzmetine silteme jasap.

QR Mádenıet jáne sport mınıstrligi qolǵa alǵan ádebıetti irikteýdi jarıalaýdaǵy maqsat – jańa zaman avtorlaryn qalyptastyrý, qalamgerlerdi izdenýge, rýhanıatymyzdy jandandyrýǵa yntalandyrý. Avtorlar usynǵan shyǵarmalardy irikteý, satyp alý, ony basý jáne taratý mınıstrlik quzyretinde ekenin atap aıtqan jón.

Taǵy bir basa nazar aýdararlyq másele tańdaýly týyndylardy irikteý maqsatynda mınıstrlik janynan qurylǵan saraptama komısıasy shyǵarmalardyń árbirin saralap, qorytyndysyn shyǵarady. Bul saraptama qorytyndylary Úkimet janyndaǵy «Qoǵamdyq mańyzy bar ádebıetti satyp alý máseleleri jónindegi Vedomstvoaralyq komısıanyń» qaraýyna usynylady. Iaǵnı, satyp alynatyn shyǵarmalardyń tizimin osy komısıa bekitedi.

Eń bastysy, irikteýden ótken shyǵarmalarǵa kótergen taqyrybynyń kókeıkestiligine oraı bir baspa tabaǵy 100-150 myń teńge kóleminde qarajat tólenedi. Al shyǵarma mınıstrliktiń menshigine ótedi. İrikteý ensıklopedıalyq jáne anyqtamalyq, kórkem, tanymdyq, qoǵamdyq-saıası, ǵylymı-kópshilik, aýdarma ádebıet, balalarǵa jáne jasóspirimderge, mádenıet jáne óner týraly, onyń ishinde notalyq (notalar shyǵarmanyń 50 paıyzyn quraıdy), mereıtoılar men ataýly kúnderge arnalǵan ádebıetter boıynsha júrgiziledi.

Qoryta aıtqanda, memleket tarapynan shyǵarmashylyq salasyndaǵy qaýymǵa kórsetiletin mundaı qamqorlyq qalamgerlerge tyń dem beretinine jáne materıaldyq turǵydan eńbekteriniń laıyqty baǵalanýy ádebıetimizge jańa týyndylar ákelýge serpin beredi.