Pavlodarda keshe tramvaıdyń astyna túsken segiz jastaǵy oqýshy qyz esin jınady, dep habarlaıdy Qamshy.kz aqparat agenttigi pavlodarnews.kz portalyna silteme jasap.

Bul týraly agenttikke oblystyq densaýlyq saqtaý basqarmasynyń baspasóz hatshysy Mahabbat Muhamadıeva málim etti.

«Búgin tańerteń túsken málimetke súıensek, qyz balanyń jaǵdaıy turaqty. Bala esin jıdy, - deıdi baspasóz hatshysy.

Dárigerlerdiń aıtýynsha, hırýrgıalyq shara qoldanýdyń qajeti joq. Naýqas tıisti em qabyldaýda.

Eske sala keteıik, qaıǵyly jaǵdaı keshe tańerteń saǵat 7:43-te oryn alǵan. Saldarynan № 4 JOBM-niń eki oqýshysy tramvaıdyń astynda qaldy.

10 jastaǵy qyz oqıǵa ornynda qaıtys bolsa, ekinshi qyz aýrýhanada jatyr. Balalardy anasy jalǵyz tárbıeleýde. Qyzdardan basqa, bul otbasynda ul bala ósip keledi. Qazirgi tańda balalardyń anasy balanyń kútimine baılanysty demalysta jáne egde jastaǵy anasy birge turady. Pavlodar oblysy prokýrorynyń orynbasary Baýyrjan Myrzakerovtyń habarlaýynsha, isti tergeýdi quzyrly organ qolǵa alǵan.

«Biz bul isti baqylaýǵa aldyq. Saraptama taǵaıyndaldy. Eger de tramvaı júrgizýshisiniń kináli ekeni anyqtalsa, tıisti shara qoldanamyz», – deıdi Baýyrjan Myrzakerov.