Memleket basshysynyń «Bolashaqqa baǵdar: rýhanı jańǵyrý» baǵdarlamalyq maqalasy jarıalanǵaly beri kóne jádigerlerimiz ben tarıhı-mádenı muralarymyzdyń ekinshi tynysy ashyldy. Búginde osyndaı ulttyq qundylyqtarymyzdy keńinen nasıhattaý jumystary qarqyndy júrgizilýde. Sonyń ishinde Shyǵys Qazaqstan oblysyndaǵy tyń bastamalar kóńil qýantady.
Osy baǵyttaǵy Elbasy tapsyrmalarynyń óńirde oryndalý barysymen tanysý maqsatynda «Nur Otan» partıasy Tóraǵasynyń Birinshi orynbasary Muhtar-Qul-Muhammed oblysqa arnaıy keldi. Sapar barysynda Muhtar Abraruly oblys ákimi Danıal Ahmetovpen birge Tarbaǵataı aýdanyndaǵy kıeli jerlerdiń biri Yrǵyzbaı ata kesenesinde boldy. Bul kesene HİH ǵasyrdyń orta tusynda salynǵan dinı arhıtektýralyq eskertkish. Yrǵyzbaı Dosqanauly zamanynda qazaq dalasyndaǵy dárilik shópterdiń qasıetteri men qoldaný tásilderin jetik meńgergen áıgili emshi jáne synyqshy bolǵan. Búginde bul orynda «Týǵan jer» baǵdarlamasy boıynsha abattandyrý jumystary júrgizilýde. Keshende keseneden bólek, meshit, mýzeı jáne eki myńnan astam kitap qory saqtalǵan kitaphana jumys isteıdi. Tipti sol kitaptardyń arasynda HVII-XVIII ǵasyrlarda jazylǵan Ibn Sınanyń medısınalyq traktattary da bar.
Elbasy bastamasyn júzege asyrýda Shyǵys jurty kópke úlgi bolyp otyrǵanyn aıtqan Muhtar Qul-Muhammed: «Búginde Shyǵys Qazaqstan oblysynda «Rýhanı jańǵyrý» baǵdarlamasy boıynsha jumystar júıeli túrde júrgizilýde. Sonyń nátıjesinde kóptegen tarıhı eskertkishter kúrdeli jóndeýden ótkizilip, halyqtyń taǵzym etetin, otandyq jáne sheteldik týrıserdiń jıi keletin, qazaq tarıhynan syr shertetin kıeli oryndarǵa aınalyp otyr. Osyndaı ıgi isterdi Elbasymyzdyń halqyna tartý etken tamasha syıy dep qabyldaýymyz kerek», – dedi.
Sondaı-aq, «Nur Otan» partıasy Tóraǵasynyń Birinshi orynbasary Abaı aýdanynda ornalasqan Qońyr áýlıe úńgirinde boldy. Munda kezinde danyshpan Abaı, uly jazýshy Muhtar Áýezov sıaqty tulǵalar arnaıy kelgen.
Jalpy Shyǵys Qazaqstan oblysynda «Rýhanı jańǵyrý» baǵdarlamasyn júzege asyrý úshin arnaıy keshendi jospar daıyndalyp, oǵan ártúrli 61 joba engizilgenin erekshe atap ótken jón.