Ortalyq komýnıkasıalar qyzmetinde oqytý prosesine engizilgen jańartylǵan mazmundaǵy oqýlyqtar sapasyna arnalǵan baspasóz konferensıasy ótti, dep habarlaıdy Qamshy.kz aqparat agenttigi Ortalyq komýnıkasıalar qyzmetine silteme jasap.
Baspasóz konferensıasyna «Oqýlyq» respýblıkalyq ǵylymı-praktıkalyq ortalyǵynyń dırektory Beıbitkúl Kárimova, «Mektep» baspasynyń bas dırektory Erlan Satybaldıev, «Orys tili» páni oqýlyqtarynyń avtorlary Zınaıda Sabıtova jáne Oksana Oprá, sonymen qatar orys tili oqýlyǵynyń sarapshysy Tamara Homenko qatysty.
«Oqýlyq» respýblıkalyq ǵylymı-praktıkalyq ortalyǵynyń dırektory Beıbitkúl Kárimovanyń aıtýynsha zamanaýı álem polımádenıetti bolǵandyqtan, onda aqparat pen tehnologıa únemi jańaryp, bilim tez eskiredi. Osyndaı jaǵdaıda bilim berý júıesi daıyn jáne standartty erejelerdi jattatýǵa emes, oqýshylardyń fýnksıonaldylyǵyn damytatyn, olardyń ózindik izdený, taldaý, ınterpretasıalaý jáne tıimdi qoldaný daǵdylaryn qalyptastyratyn, praktıkaǵa baǵyttalǵan, quzyrlylyq pedagogıkaǵa kóshedi. Osyǵan baılanysty oqýlyqtyń qyzmeti de ózgeredi. Ol oqý aqparaty kózinen bilim alýshylardyń ózindik oqý is-áreketin uıymdastyrýshy navıgatorǵa aınalady. Oqý barysynda oqýlyqtyń jalyqtyrmaıtyndyǵyn, onyń qyzyqsyz emes ekenine kóz jetkizgen oqýshylar úshin onyń tartymdylyǵy da arta túsedi.
«Mektep» baspasynyń bas dırektory Erlan Satybaldıev jańartylǵan bilim mazmunyndaǵy oqýlyqtardy ázirleýdiń erekshelikteri týraly aıtty.
Orys tili oqýlyqtarynyń avtorlary Zınaıda Sabıtova men Oksana Oprányń sózderi boıynsha orys tilin oqytýdyń jańa tujyrymdamasynda basymdyq leksıkalyq-grammatıkalyq materıaldarǵa emes, tildik taqyryptar konteksinde gramatıkalyq materıaldardy oqytýǵa, qazaqstandyq qoǵam ómiriniń ár túrli sferalary boıynsha mátinder materıaldary negizinde tildik is-árekettiń barlyq túrlerin (tyńdaý, sóıleý, jazý, oqý) damytýǵa beriledi. Sonymen qatar olar BAQ jáne áleýmettik jelilerde 5 jáne 7 synyptarǵa arnalǵan orys tili oqýlyqtarynyń mazmuny boıynsha berilgen eskertpelerge tolyqtaı túsiniktemeler berdi.
Orys tili oqýlyǵynyń sarapshysy Tamara Homenko sarapshylardyń osy oqýlyqtardy bilim berý uıymdarynda qoldanýǵa ruqsat berý sheshimderiniń sebep-negizderi týraly jan-jaqty túsinikteme berdi.
2016 jyldan bastap Qazaqstanda jańartylǵan bilim mazmuny kezeń-kezeńmen engizilýde. Aǵymdaǵy jyly 2, 5 jáne 7 synyp oqýshylary jańartylǵan bilim mazmuny baǵdarlamalary boıynsha oqýǵa kóshti.
