Almaty qalasyndaǵy «Dostyq úıi» ǵımaratynda «Qazaqstan Respýblıkasynyń keıbir zańnamalyq aktilerine dinı qyzmet jáne dinı birlestikter máseleleri boıynsha ózgerister men tolyqtyrýlar engizý týraly» ázirlengen zań jobasyn talqylaý boıynsha qoǵmdyq pikir kóshbasshylarymen jáne ǵylymı-sarapshylar qaýymdastyǵy ókilderimen dóńgelek ústel ótti dep habarlaıdy Qamshy.kz aqparat agenttigi.
Atalǵan is-sharaǵa QR Din isteri jáne azamattyq qoǵam mınıstrliginiń vıse-mınıstri B.S. Aryn, Mınıstrliktiń Din isteri komıteti tóraǵasynyń mindetin atqarýshy E.Á. Ońǵarbaev, Azamattyq qoǵam ister komıtetiniń tóraǵasy Á.Q.Ǵalımova, sonymen qatar tanymal ǵalymdar, dintanýshylar, teologtar, zańgerler, blogerler men úkimettik emes uıymdardyń ókilderi bolyp tabylatyn A.Bıjanov, Á.Derbisáli, N.Baıtenova, E.Býrova, N.Seıdahmetova, E.Dúısenov, R.Podoprıgora, A.Ábýov, B.Satershınov, A.Sabdın, E.Shohaev, A.Sarym, R.Jumaly, M.Telibekov, I. Qýanyshqyzy jáne taǵy basqa da sarapshylar men qoǵamdyq pikir jetekshileri qatysty.
«Biz zań jobasynyń jumysyna memlekettik organdarmen qatar qoǵamnyń da belsendi aralasýyna múddelimiz. Biz úshin azamattyq qoǵamnyń barlyq ókilderimen ashyq suhbat júrgizý mańyzdy» - dep atap ótti vıse-mınıstr Berik Aryn óz sózinde.
Zań jobasyn prezentasıalaǵan Ońǵarbaev Erkin Ánýaruly qatysýshylardy zań jobasyna engizilip otyrǵan ózgeristermen jáne tolyqtyrýlarmen jan-jaqty tanystyryp ótti.
Jalpy, Zań jobasyn daıyndaý barysynda memlekettik organdardyń, qoǵamdyq birlestikterdiń, sarapshylar qaýymdastyǵy men azamattardyń usynystary men pikirleri barynsha eskerildi. Qoldanystaǵy zańnamalarǵa jańa normalardy engizý barysynda halyqaralyq tájirıbege basa nazar aýdaryldy.
Kezdesýge qatysýshylar din salasyndaǵy zańnamany jetildirýdiń jáne atalǵan qujatty qabyldaýdyń qajettiligine jalpy qoldaý kórsete otyryp, zańnama jobasyna qatysty óz eskertýleri men usynystaryn bildirdi.
Sharany tujyrymdaǵan vıse-mınıstr B. Aryn kezdesýge qatysýshylarǵa rızashylyǵyn bildirip, búgingi aıtylǵan barlyq usynystar men eskertýlerdiń muqıat zerttelenetindigin jáne qarastyrylatyndyǵyn atap ótti.
Bul Zań jobasy Qazaqstan Respýblıkasynyń ózin demokratıalyq, zaıyrly memleket retinde ornyqtyratynyn, árkimniń ar-ojdan bostandyǵy quqyǵyn rastaıtynyn, árkimniń dinı nanymyna qaramastan teń quqyly bolýyna kepildik beretinin, hanafı baǵytyndaǵy ıslamnyń jáne pravoslavıelik hrıstıandyqtyń halyqtyń mádenıetiniń damýy men rýhanı ómirindegi tarıhı rólin tanıtynyn, Qazaqstan halqynyń rýhanı murasymen úılesetin basqa da dinderdi qurmetteıtinin, konfesıaaralyq kelisimniń, dinı taǵattylyqtyń jáne azamattardyń dinı nanymdaryn qurmetteýdiń mańyzdylyǵyn tanıtynyn negizge alady.
