Aqtóbe qalasynda «Nurly jer» baǵdarlamasy boıynsha salynǵan alǵashqy úı paıdalanýǵa berildi dep habarlaıdy Qamshy.kz aqparat agenttigi. 9 qabatty úıge turǵyndardy kirgizý saltanatyna Aqtóbe oblysynyń ákimi Berdibek Saparbaev, Aqtóbe qalasynyń ákimi Ilás Ispanov, «Qazaqstan turǵyn úı qurylys jınaq banki» AQ Basqarma tóraıymy Lázzat Ibragımova, «Damý» Kásipkerlikti damytý qory» AQ Basqarma tóraǵasy Abaı Sarqulov, «Sberbank» AQ EB Basqarma tóraǵasy Aleksandr Kamalov, «Sollers» JSHS dırektory Andreı Storojev qatysty.
Kóp qabatty turǵyn úı qurylysyn qarjylandyrý maqsatynda Sberbank «Sollers» qurylys kompanıasyna 3 jyl merzimge 400 mıllıon teńgege nesıe jelisin ashty. Al kompanıa qurylysqa 102 mln teńge óz qarjysyn saldy. Jobanyń jalpy quny 502 mln teńge. Sberbank, Qazaqstan turǵyn úı qurylys jınaq banki jáne «Sollers» kompanıasynyń arasynda shartqa qol qoıyldy. Ol qujat boıynsha páterlerdiń 50%-yn Qazaqstan turǵyn úı qurylys jınaq banki óz salymshylaryna taratady. Iaǵnı, 27 páter Qazaqstan turǵyn úı qurylys jınaq banki salymshylaryna sharshy metri 140 myń teńgeden beriledi. Qalǵan páterlerdi qurylys kompanıasy ózi sata alady nemese Qazaqstan turǵyn úı qurylys jınaq bankiniń salymshylaryna usyna alady. «Nurly jer» baǵdarlamasynyń aıasynda «Sollers» JSHS nesıe paıyzyn sýbsıdıalaı aldy. Jylyna 14% mólsherlemeniń 7 paıyzyn «Damý» Qory qarjylandyrady. Turǵyn úı kesheniniń jalpy aýmaǵy 3 771 sh.m.
«Bul joba bıznes, memleket jáne banktiń tıimdi áriptestiginiń kórinisi. «Nurly jer» baǵdarlamasynyń arqasynda turǵyn úı qurylysy men ıpotekalyq nesıelendirý salasynda oń ózgeristerge qaraı jol ashylatyn bolady. Biz óz tarapymyzdan baǵdarlamaǵa belsendi qatysyp, jaqyn ýaqytta Qyzylorda men Oraldaǵy qurylys kompanıalaryn qarjylandyrmaqpyz», - deıdi «Sberbank» AQ EB Basqarma tóraǵasy Aleksandr Kamalov.
«Nurly jer» baǵdarlamasynyń halyqtyń turǵyn úı jaǵdaıyn jaqsartýǵa arnalǵan kóptegen baǵyttary bar. Sonyń biri – «Turǵyn úı salýǵa jeke qurylys kompanıalaryn yntalandyrý» dep atalady. Búgin osy baǵyt aıasynda birinshi úı paıdalanýǵa berilip, qonystanǵandar arasynda Turǵyn úı qurylys jınaq bankiniń salymshylary da bar. Bul - jaǵymdy jańalyqtyń sońy emes dep oılaımyn. Baǵdarlama boıynsha jyl sońyna deıin 12 myńǵa jýyq páter men 350-deı jeke úılerdiń qurylysy bitip, halyqqa beriledi»,-dedi «Turǵyn úı qurylys jınaq banki» AQ Basqarma tóraıymy Lázzat Ibragımova.
«Búginge deıin «Damý» Qory eki qurylys kompanıasyn sýbsıdıalady. Bul - «Solers» jáne astanalyq «Altyn Shar West». Endeshe biz jaqynda Astanada 20 myń sh.m bolatyn úlken keshendi paıdalanýǵa beremiz dep úmittenemiz. Keshen sol jaq jaǵalaýda, EXPO 2017 kórmesi mańynda ornalasady. Turǵyn úı aýmaǵynda balalar jáne sporttyq alańdar salynyp, joldar jóndelip, jabyq parkıng, saýda-kóńil kóterý oryndary bolady. Qazir ekinshi deńgeıli bankterdiń qaraýynda 24 qurylys kompanıasynyń ótinimi jatyr. Onyń beseýi maquldanyp ta qoıdy. Iaǵnı, qurylys kompanıalary tarapynan «Nurly jer» baǵdarlamasyna degen qyzyǵýshylyq joǵary. Bul - úıdiń baǵasyna da oń áserin tıgizýi kerek»,- dedi keshenniń ashylýynda sóz alǵan «Damý» Qorynyń Basqarma tóraǵasy Abaı Sarqulov.
