Elimizde qyrkúıek aıynyń ekinshi jeksenbisi «Otbasy» kúni retinde belgilingen. 4 jyldan beri atalyp kele jatqan kúnniń dástúrli sharasy respýblıkalyq «Mereıli otbasy» baıqaýy bıyl da jalǵasyn tapty. Baıqaý 16 qyrkúıekte «Qazaqstan» OKZ-de ótetin saltanatty rásimmen qorytyndylanady, dep habarlaıdy Qamshy.kz aqparat agenttigi.
Bul týraly búgin Ortalyq komýnıkasıalar qyzmetinde baıqaý uıymdastyrýshylarymen ótken baspasóz konferensıada belgili boldy. «Mereıli otbasy» ulttyq konkýrsyn ótkizý boıynsha Qazaqstan Respýblıkasy Prezıdentiniń janyndaǵy Áıelder isteri jáne otbasylyq-demografıalyq saıasat jónindegi ulttyq komısıa ótkizip keledi. Bıylǵy jyly konkýrsqa 2879 otbasy qatysyp, olardyń ishinde 1041 otbasy kóp balaly ekeni anyqtalǵan. Sonymen qatar, ótken jylmen salystyrǵanda eńbekkerler áýletteri ókilderinen quralǵan otbasylardyń sany 6,8%-ǵa ósip, bıyl 516 otbasy qatysqan.
Ulttyq komısıa tóraıymynyń orynbasary Lázzat Súleımen atap ótkendeı, Memleket Basshysynyń «Bolashaqqa baǵdar: rýhanı jańǵyrý» baǵdarlamalyq maqalasynda qoǵamnyń rýhanı oı-sanasyn jańǵyrtýdyń negizgi baǵdarlary aıqyndalǵan. Bul baǵyttaǵy otbasy ınstıtýtynyń roli óte joǵary.
«Mereıli otbasy» konkýrsynyń fınaldyq kezeńinde jeńimpazdy anyqtaý úshin eldiń barlyq azamattary kaztube.kz saıtynda jáne SMS-habarlamalar arqyly ınteraktıvti daýys berý arqyly tikeleı qatysa alatyndyǵyn eske salamyz. Al jeńimpaz otbasyǵa «Mereıli otbasy» ulttyq konkýrsynyń laýreaty ataǵy beriledi.
Sonymen qatar, Ortalyq komýnıkasıalar qyzmetinde ótken baspasóz konferensıaǵa qatysqan Ulttyq komısıanyń múshesi, QR Parlamenti Májilisiniń depýtaty Baqytbek Smaǵul Ulttyq komısıa ákeniń bala tárbıesindegi rolin kúsheıtýge, otbasy ınstıtýtyn nyǵaıtýǵa jáne otbasylyq tárbıe máselelerine qoǵamnyń nazaryn aýdarýǵa erekshe kóńil bólip otyrǵanyn atap ótti.
