Astana, 11 qyrkúıek, Májilis úıi. Dúısenbi, 11 qyrkúıekte, Májiliste «Memlekettik tildiń latyn grafıkasyndaǵy álipbıiniń biryńǵaı standartyn engizý máseleleri týraly» parlamenttik tyńdaý ótti, dep jazady Qamshy.kz tilshisi.

Memlekettik tildi jańǵyrtý qajettiligin, onyń ishinde latyn grafıkasyna ótý týraly Memleket basshysy N.Á. Nazarbaev «Qazaqstan – 2050 strategıasy qalyptasqan memlekettiń jańa saıası baǵyty» atty Qazaqstan halqyna joldaýynda atap ótken bolatyn.

Parlamenttik tyńdaýda Májilis Tóraǵasy N. Nyǵmatýlın: «Bizdiń   ulttyq sana-sezim, rýhanı damý, órkendeý jolymyz, osynyń barlyǵy, qazaq    tiliniń    jańa    álipbıin  jasaýdan   bastalady. Sebebi, Elbasymyz Nursultan Ábishuly Nazarbaev aıtqandaı, qazaq  tili  –   ol   bizdiń  rýhanı  negizimiz. Osy jolda tildiń halyqaralyq mártebesin kóterý, bizdiń álemdik órkenıetke  jetýimizdiń  basty  kepili. Sonymen  birge,  jańa  álipbı búkil álem qazaqtaryn biriktiretin  óte mańyzdy faktor» - dedi.

Osy rette Palata spıkeri  til jáne jańa álipbı máselesinde qatelikke jol berýge bolmaıtynyna, qazaq tilin jańǵyrtýdyń basty kórsetkishi latyn jazýyna kóshý ekendigine jáne álem qazaqtaryn biriktiretin mańyzdy faktor ekenine toqtaldy.

Otyrys barysynda halyq qalaýlylary men belgili saıasatkerler, zıaly qaýym ókilderi, ǵalymdar, sarapshylar men til mamandary, qoǵamdyq uıym músheleri jańa álipbıdiń jobasyn ázirlegen mamandardyń eńbekterimen tanysty.