Almatyda "Qazaq tiliniń latyn álipbıine kóshýdegi erekshelikteri" atty dóńgelek ústelde jazýshy, kınodramatýrg Smaǵul Elýbaı sóz sóıledi.

"Biz sáýir aıynda Elbasymen ótken kezdesýde latyn álipbıine ótý týraly kóp oı aıtqan edik. Sonyń biri, barlyq memlekettik bilim berý oryndarynda, balabaqshalarda 3 túrli álipbıdi oqytý qajet dep sanaımyz.

Máselen, qazaq tilinde ótetin pánderdi latyn álipbıinde, orys tilindegi sabaqtar kırıllısada jáne aǵylshyn tilindegi pánder úshin  aǵylshyn álipbıin qoldaný qajet. Osy oraıda biz birligimizdi saqtap, ony ári qaraı damytýǵa úles qosa alamyz. Sonda ǵana bizdiń bolashaq urpaq úsh tildi tereń meńgerip,  naǵyz saýatty azamat bolmaq.

Qıyn deýlerińiz múmkin. Alaıda, bul másele eshqandaı qıyndyq týdyrmaıdy. Óıtkeni orys tilindegi pánder kırıllısada óte bermek, al aǵylshyndy oqyp júrgender úshin latyn álipbıine ótý ońaı soǵady.  Jastarymyz ultyna qaramaı úsh tildi teńdeı meńgerip shyǵady. Eki tilge bóliný, birin-biri túsinbeý  degen máselelerdi túbegeıli joıyp, birligimiz arta beredi demekpin.

Budan bólek, latyn álipbıine óte otyryp, mádenı muramyz ben tarıhymyzdy tereńnen zertteýge múmkindik alatynymyzdy eskerý qajet" dedi Smaǵul Elýbaı.