Latyn álipbıine kóshýge qatysty «Jas Otan» korporatıvtik qorynyń basshysy M. Ahmetov Nursultan Nazarbaevqa hat joldady dep habarlaıdy Qamshy.kz aqparat agenttigi. Onyń mátini tómendegideı.
"Qazaqstan Respýblıkasynyń Prezıdenti,
Elbasy Nursultan Ábishuly Nazarbaevqa
Asa mártebeli, Nursultan Ábishuly, Táýelsizdigimizdi alǵan sátten bastap, siz Qazaqstan jastaryna árdaıym demep, qolaıly jaǵdaı jasap kelesiz. Onyń ishinde elimizdegi jastardyń ordasy sanalatyn Almaty qalasynyń jastaryna degen iltıpatyńyzdy erekshe sezinip kelemiz. Buǵan dálel retinde shırek ǵasyr aralyǵynda Sizdiń bastamalaryńyz ben saıası ustanymyńyz jastardyń ortasynda qoldaýǵa ıe bolyp, biraýyzdan maquldanyp otyrǵanyn aıtýǵa bolady.
Latyn álipbıne kóshý máselesi erteden talqyǵa túsip, qoǵamdaǵy ózekti máselelerdiń biri bolǵany belgili. Siz ózińizdiń saıası kóregendigińizdiń arqasynda osy jolyda latyn álipbıine kóshýdi jyldamdatý baǵytyn ustanyp, halyqtyń oıyndaǵy máseleni dál ýaqytynda qolǵa aldyńyz. Ásirese bul úderis qazaqstandyq jastarǵa ǵylym men tehnıkany meńgerýge jol asha otyryp, tól álipbıimizdiń qaıta jańǵyrýyna múmkindik bermek. Latynǵa kóshkenimizde utatyn tustarymyz: birinshiden tilimizdegi qazirgi jat dybystardy tańbalaıtyn áripterdi qysqartyp, sol arqyly qazaq tiliniń tabıǵı taza qalpyn saqtaýǵa múmkindik alamyz. Ekinshiden, qazaq tilin oqytqan ýaqytta basy artyq tańbalarǵa qatysty emle, erejelerdiń qysqaratyny belgili. Ol mektepten bastap barlyq oqý oryndarynda oqytý úrdisin jeńildetedi. Ýaqyt ta, qarjy da únemdeledi. Úshinshiden, latyn álipbıine kóshý – qazaq tiliniń halyqaralyq dárejege shyǵýyna jol ashady. Qazaq tiline kompúterlik jańa tehnologıalar arqyly halyqaralyq aqparat keńistigine kirigýge tıimdi joldar ashylady. Tórtinshiden, túbi bir túrki dúnıesi, negizinen, latyndy qoldanady. Bizderge olarmen rýhanı, mádenı, ǵylymı, ekonomıkalyq qarym-qatynasty, tyǵyz baılanysty kúsheıtýimiz kerek.
Osy maqsatta elimizdegi «Nur Otan» partıasynyń janyndaǵy «Jas Otan» Jastar qanatynyń belsendileri jastardyń arasynda latyndandyrý baǵdarlamasyn qoǵamdyq talqylaý aıasynda túsindirý jumystaryn bastap ketti. Sizdiń, bizge artqan úmitińizben senimińizdi aqtap, jastar tarapynan qajetti sharalardy júrgizetin bolamyz" dep jazdy «Jas Otan» korporatıvtik qorynyń basshysy M. Ahmetov.
