Latyn álipbıine kóshýge qatysty «Almaty Stýdentter alánsy» respýblıkalyq stýdenttik qozǵalysynyń  atqarýshy dırektory S. Sandybaeva Nursultan Nazarbaevqa hat joldady dep habarlaıdy Qamshy.kz aqparat agenttigi. Onyń mátini tómendegideı.

"Biz, Almaty qalalyq «Stýdentter alánsy» uıymynyń músheleri, Sizdiń «Bolashaqqa baǵdar: rýhanı jańǵyrý» atty maqalańyzda kórsetilgen maqsattar men ustanymdarǵa qoldaý bildiremiz.

Búgingi jastar arasynda salaýatty ómir salty men bilimdi bolý úlgige aınalyp, olar jańa kásip ıgerip, aǵylshyn tilin meńgerýge bar kúsh-jigerin jumsap júr.

Latyn álipbıine kóshý zaman talaby ekenin jas býyn bar nazarymen uǵynady. Búgingi tańda úlgi retinde usynylǵan latyn álipbıiniń nusqasy áleýmettik jeli qoldanýshylary arasynda belsendi qoldanysqa enip jatyr.

Álemdik ekonomıkalyq, ǵylymı keńistikke enýimizdiń alǵysharty álipbıimizdiń latyn qarpine aýysý bolǵandyqtan, biz Siz bastaǵan latyn árpine kóshý jobasyn tolyǵymen qoldaımyz.

Siz mejelegen XXI ǵasyrdyń álemdik kartasynda eshkimge uqsamaıtyn, derbes orny bar memleket, tarıhı túbi bir túrki elderiniń biri ári biregeıi ekendigimizdi anyqtaıtyn latyndandyrý jobasyna qoldaý bildiremiz  ári sol maqsat jolynda aıanbaı eńbek etemiz.

Olaı bolsa, Sizdiń syndarly saıasatyńyzǵa árqashan qoldaý bildirip, Qazaq eliniń jalyndy jastaryna artqan senimińizdi aqtaýǵa ýáde beremiz" dep jazdy «Almaty Stýdentter alánsy» respýblıkalyq stýdenttik qozǵalysynyń  atqarýshy dırektory S. Sandybaeva.