Túrkıada jantúrshigerlik kólik apatyna ushyraǵan 7 qazaqstandyqtyń úsheýi elge aman-esen oraldy, ― dep habarlaıdy Qamshy.kz aqparat agenttigi. Apat kezinde Vadım, Batyrhan, Dılára jeńil jaraqat alǵan.

Taldyqorǵan qalasy ákimdigi baspasóz qyzmetiniń málimeti boıynsha, olar qazir Almaty qalasynda eken. Olar tıisti emin alýda. Al, Nursultan, Almagúl, Asyl jáne Aıdyn esimdi qazaqstandyqtar áli de tósek tartyp jatyr. Qazir olardy  elge jetkizý jumystary júrgilýde.

«Bári órimdeı jastar. 1992 jyly týǵan meniń baýyrym Nursultan sonaý mektep kezinen Almagúlmen júretin. Osy jaqynda ǵana, 9 qyrkúıekte toıyn ótkizgenbiz. Sonda dostary Túrkıaǵa joldama syılaǵan edi. Bal aıynyń sońy osyndaı bolady dep oılamappyz, áıtpese jibermes edik qoı», ―  deıdi Taldyqorǵan qalasynyń turǵyny Elzıra.

Osy oqıǵaǵa baılanysty, Taldyqorǵan qalasynyń  ákimdigi apatqa túsken jastardyń ata-analarymen, týǵan-týystarymen habarlasyp, qandaı kómekke muqtaj ekenderin suraǵan bolatyn. Ata-analar elge balalary aman-esen jetse, medısınalyq turǵydan kómek kórsetilse eken deıdi.

Sondyqtan qala ákiminiń orynbasary oblystyq densaýlyq saqtaý basqarmasynyń basshysymen aqyldasyp, apatqa túsken jastardy kútip alý úshin bar jaǵdaıdy qarastyryp jatyr. Qajet bolǵan jaǵdaıda taldyqorǵandyq jastardy Almatynyń nemese  Astananyń aýrýhanalaryna jatqyzýǵa da járdem kórsetilýi múmkin.

Eske sala ketetin bolsaq, 21 qyrkúıekte Túrkıanyń  Kemer qalasy mańynda bolǵan jol apaty saldarynan 7 qazaqstandyq aýrýhanaǵa túsken edi. Der kezinde kórsetilgen medısınalyq kómek pen hırýrgıalyq ota jastardyń janyn saqtap qaldy.