Almatyda Qala kúni aıasynda jyl saıyn 200 myńnan asatyn qala turǵyndary men qonaqtary jınalatyn «AlmaFest – 2017» dástúrli alma festıvali ótýde. Festıvál barysynda «Almaty qalasynyń qurmetti azamaty» ataǵymen marapttaý saltanaty ótti.
Almaty ákimi Baýyrjan Baıbek Almatynyń mádenı, ǵylym- bilim, sport, qarjy jáne iskerlik ortalyq ekenin atap ótti. Osynyń barlyǵy megapolısti ómir súrýge, jumys isteýge, demalýǵa jaıly meken etýde.
«Almatyda týǵan, ósip-óngen jáne osynda turatyn azamattar úshin bul tek janǵa jaıly qala ǵana emes. Bul - týǵan ólke, qashan da júregińniń tórinen erekshe oryn alatyn qasıetti meken. Elbasy Nursultan Ábishuly Nazarbaev «Bolashaqqa baǵdar: rýhanı jańǵyrý» atty maqalasynda «Patrıotızm týǵan jerińe degen súıispenshilikten bastalady» - dep atap ótken bolatyn. El Táýelsizdigi de shartarapqa Almatydan jarıalandy, Ata Zańymyz, memlekettik rámizderimiz ben ulttyq valútamyz bizdiń qalamyzda bekitildi. Almaty máńgige Táýelsizdigimizdiń altyn besigi bolyp qala bermek. Megapolıste bıznes qarqyndy damyp, shahar ekonomıkasy 100 ese artty. Myńdaǵan jumys oryndary ashyldy. Elbasy aıtqandaı, «Almaty – Ortalyq Azıanyń injý-marjany», - dep atap ótti Baýyrjan Baıbek.
Saltanatty shara sheńberinde «Almaty qalasynyń qurmetti azamaty» ataǵyna Qazaqstannyń memlekettik saıası qaıratkeri, elshi, ekonomıka ǵylymdarynyń doktory, elimizdiń voleıbol Federasıasynyń prezıdenti Abyqaev Nurtaı Abyqaıuly, Qazaq SSR Mınısterler Keńesi tóraǵasynyń burynǵy orynbasary Jánibekov Sháńgereı Jánibekuly, Stalıngrad shaıqasyna qatysýshy, otstavkadaǵy polkovnık, aqyn, tabıǵatty saqtaý qoǵamynyń Almaty keńesiniń tóraǵasy Gırsh Leonıd Iýzefovıch ıe boldy.
«ALMAFest-2017» — megapoıste osymen altynshy ret ótip jatqan aýqymdy mádenı- kóńildi shara. Saıabaq aýmaǵynda túrli belsendilik aımaqtary: «ALMA ART», «ALMA BAZAR», «ALMA OTBASY», «ALMA MASTER», «ALMA AUEN», «ALMA FASHION» ı «ALMA DRIVE» jumys isteýde, munda ashyq aspan astynda degýstasıa jáne 100 tonnadan asatyn almalardy satý, sporttyq, kórkemdik alańdar, sheberlik synyptary, balalar men otbasylar úshin oıyndar uıymdastyrylǵan. Qolónershilerdiń kórme aýmaǵynan túrli zergerlik buıymdar men aksesýarlardy, fýrnıtýralardy alýǵa bolady. Aıta keterligi, Almaty oblysynyń tórt aýdanynan almanyń 20-dan asatyn sorttary ákelingen jáne olardy bazardyń orta baǵasynan 20%-ǵa tómen alýǵa bolady.
Qala kúni aıasynda «Almaty Arenada» saǵat 17:00-de Evrazıalyq «EMA-2017» mýzyka syılyǵy ótedi, munda otandyq jáne sheteldik estrada juldyzdary Qaırat Nurtas, Kental, Keshú, Dıas Ablaev, Lýına, Ádemi, Dınara Sultan, Zırýza, Álisher Karımov, Rahat Lýkým, Rıngo jáne basqalary án shyrqaıdy. Festıvál hedlaıneri Soso Pavlıashvılı men «Ninetty one» toby.
Qala kúni merekesi «Astana» alańynda saǵat 21.00-de aıaqtalady, munda merekelik otshashý bolady.
Aıta keterligi, megapolıste Qala kúni merekesi aıasynda halyqaralyq «Star of Asia», «Kok-Tobe Opera» festıválderi, kópmyńdyq Open Air «Gakku daýsy» jáne basqalary ótti. Qala kúnine júrginshige basymdyq beretin Panfılov, Jibek joly, Gogol, Qabanbaı batyr kósheleri qaıta jasaldy. Buryndary qaıta jańarǵan «Astana» alańy,Naýryzbaı aýdanynyń jańa ákimshilik- iskerlik ortalyǵy,qalanyń «Open Almaty» qoǵamdyq qabyldaý ortalyǵy jáne basqalary ashylǵan edi.
