Almaty qalasynda ákim apparatynyń «Open Almaty» qoǵamdyq qabyldaý alańynda memlekettik qyzmetterdiń jármeńkesi bolyp ótti, dep habarlaıdy Qamshy.kz aqparat agenttigi.

Atalmysh is-sharany Memlekettik qyzmet isteri jáne sybaılas jemqorlyqqa qarsy is-qımyl agenttiginiń Almaty qalasy boıynsha departamenti men Almaty qalasynyń ákimdigi uıymdastyrdy.

Memlekettik qyzmetter túrleriniń jármeńkesine sáýlet jáne qala qurylysy, densaýlyq saqtaý, bilim, azamattyq hal aktilerin tirkeý, jer qatynastary jáne basqa da baǵyttar boıynsha memlekettik qyzmetter kórsetetin 23 memlekettik organ qatysty.

Atalǵan sharaǵa jalpy 922 adam kelip, onyń 727-si ózderine qajetti málimetter aldy, al 195 adamǵa tikeleı qyzmet kórsetildi.

Jármeńkeniń negizgi maqsaty – halyqqa keńes berý, ádistemelik kómek kórsetý jáne de memlekettik qyzmetterdi nasıhattaý. Sonymen qatar, halyqqa kórsetiletin memlekettik qyzmetterdi usyna tártibin jáne «Azamattarǵa arnalǵan úkimet» memlekettik korporasıasynyń «elektrondy úkimet» portaly arqyly kórsetiletin qyzmetter týraly keńinen túsindirý bolyp tabylady.

Memlekettik ister jáne sybaılas jemqorlyqqa qarsy is-qımyl agenttiginiń Almaty qalasy boıynsha departament basshysy Baıqanova Aıgúl bul sharanyń negizgi maqsatyna toqtalyp ótti.

«Búgin biz memlekettik qyzmetter jármeńkesin ótkizip jatyrmyz. Onyń maqsaty – halyqqa memlekettik qyzmetti qalaı alý kerektigin keńinen túsindirý, taratý. Toǵyz aıdyń esebi boıynsha Almaty qalasynda 9 mıllıonnan astam memlekettik qyzmet kórsetildi. Onyń 60%-y ǵana elektrondy úkimet jáne halyqqa qyzmet kórsetý ortalyqtary arqyly kórsetilipti. Ol – óte tómen kórsetkish. Al qalǵan 40%-y qyzmetti memlekettik organdarǵa baryp alyp jatyr. Bul – óte yńǵaısyz jáne de sheneýnik pen halyq arasynda kezdesý bolǵandyqtan sybaılas jemqorlyqqa septigin tıgizýi múmkin. Kezinde, halyqqa qyzmet kórsetý ortalyqtary qoǵamdaǵy jemqorlyqty joıý maqsatynda ashylǵan.

Qazirgi tańda memlekettik qyzmetterdiń barlyǵy avtomattandyrylyp jatyr. Sony elektrondy úkimettiń baǵytyn, sol arqyly memlekettik qyzmetti alýdyń durys jolyn kórsetý úshin búgingi is-sharany uıymdastyryp jatyrmyz», - deıdi Baıqanova Aıgúl.

Memlekettik qyzmetter jármeńkesin ótkizýdiń mańyzdylyǵyn atap ótken departament basshysy bul sharanyń halyqqa kóptegen paıdasyn tıgizetindigin aıtady.

Onyń aıtýynsha, jármeńke bastalǵannan eki saǵattyń ishinde eki júzge jýyq adam kelgen.

Aıta keter bolsaq, jalpy, Almaty qalasynda 478 memlekettik organ memlekettik qyzmetterdi kórsetedi, usynylatyn qyzmetterdiń jalpy sany 353-ti quraıdy.

Búgingi tańda memlekettik korporasıa jáne «elektrondy úkimet» portaly arqyly memlekettik qyzmetterdiń 60%-y kórsetiledi.

Jármeńkege  kelýshilerdiń basym kópshiligi  salyq tólemderin júrgizýdiń tártibi men sharty, advokattyq jáne natorıaldyq qyzmet boıynsha lısenzıalar alý, jer telimderi, jyljymaıtyn múlikterdi resimdeý týraly suraqtar qoıdy.

Kópshilik tarapynan elektrondy sıfrly qoltańba, mekenjaıy jáne sottalmaǵandyǵy týraly anyqtama alý, jyljymaıtyn múlikti tirkeý quqyqtary, medısına uıymdaryna tirkelý jáne elektrondy qyzmetterdiń ózge de túrleri boıynsha saýaldar kóp  tústi.

40 adamnan medısınalyq uıymdarǵa tirkeý boıynsha ótinim berilip, olarǵa elektrondy sıfrly qoltańba alǵan soń qyzmet kórsetildi.

Mundaı  memlekettik qyzmet jármeńkesi qalanyń barlyq aýdanynda jalǵasatyn bolady. Jaqyn arady Túrksib jáne Naýryzbaı aýdandarynda jármeńke ótkizý josparlanǵan.