Almaty qalasynda Dostyq úıinde «Jahandyq básekege qabilettilik jolynda: Memleket Basshysy N.Á.Nazarbaevtyń 5 ınstıtýsıonaldyq reformany júzege asyrý jónindegi «100 naqty qadam» ult jospary» atty dóńgelek ústel bolyp ótti, dep habarlaıdy Qamshy.kz aqparat agenttigi.

«Qoǵamdyq joba» mekemesi Almaty qalasynyń İshki saıasat basqarmasynyń Memlekettik áleýmettik talaptaryna sáıkes «Almaty qalasynda 5 ınstıtýsıonaldyq reformany júzege asyrý maqsatynda is-sharalar ótkizý» jobasyn iske asyrý úshin birshama is-sharalar, dóńgelek ústelder uıymdastyrýda. Solardyń biri – Almaty qalasyndaǵy Dostyq Úıinde ótken «Jahandyq básekege qabilettilik jolynda: Memleket Basshysy N.Á.Nazarbaevtyń 5 ınstıtýsıonaldyq reformany júzege asyrý jónindegi «100 naqty qadam» ult jospary» atty dóńgelek ústel bolyp tabylady.

Atalmysh sharaǵa moderator retinde Abaı atyndaǵy QazUPÝ profesory, ǴST, Almaty qalasy QHA QKK múshesi Dana Mýkatova qatysty. Sonymen qatar Almaty qalasy Qazaqstan halqy Assambleıasy tóraǵasynyń orynbasary Qazbek Mamsýrov, QR Almaty qalasy boıynsha Memlekettik qyzmet isteri jáne sybaılas jemqorlyqqa qarsy is-qımyl agenttiginiń basshysy orynbasary Gennadıı Danıarov, Almaty qalasy Qoǵamdyq keńesiniń múshesi Dáýren Babamuratov jáne ózge de memlekettik jáne qoǵamdyq uıym basshylary, saıası partıa músheleri, ár túrli ýnıversıtet stýdentteri men muǵalimderi qatysty.

Qoǵamdyq keńes múshesi Dáýren Babamuratov «Almaty qalasynyń áleýmettik mańyzdy máselelerin sheshýde azamattyq qoǵam men bıliktiń ózara árekettestigin kúsheıtýdegi Qoǵamdyq kelisimniń róli» jaıynda dóńgelek ústel barysynda baıandap berdi.

«Barlyqtaryńyz biletin «100 naqty qadamnyń» ishindegi eń mańyzdylarynyń biri búkil Respýblıka kóleminde Qoǵamdyq keńesterdiń qurylýy bolyp tabylady. Qoǵamdyq keńester ne úshin quryldy? Áli kúnge deıin jer-jerlerde Qoǵamdyq keńester qandaı qyzmet atqarady? Bul da bir baqylaıtyn organ ba álde jáı ǵana kezekti basqosý ma? degen sekildi alyp-qashpa pikirler de óte kóp, soǵan sáıkes suraqtar da týyndap jatady. Birinshiden, Qoǵamdyq keńes – memlekettik bılik pen qoǵamnyń, halyqtyń arasyndaǵy dıalogty kúsheıtý. Ekinshiden, bul – bılik pen halyq arasyndaǵy dıalogty túrlendirý. Úshinshiden, Qoǵamdyq keńes – quzyrly memlekettik organdarǵa qoǵamnyń tarapynan baqylaýdy kúsheıtý.

Joǵaryda atalǵan maqsattar qanshalyqty oryndalyp jatyr? Almaty qalasynyń tóńireginde Qoǵamdyq keńes jumysynyń qanshalyqty júzege asyp, júıeli túrde ótip jatqandyǵyn aıty keter bolsaq, munyń atqaryp otyrǵan sharýasy óte kóp. Bizdiń almatykenes.kz atty saıtymyz bar, sonyń ishinde atqaryp otyrǵan jumystar, ótilip jatqan is-sharalar barlyǵy da kórsetilgen. Kez kelgen ýaqytta ózderińizge kerekti aqparatpen tanysa alasyzdar», - dep Qoǵamdyq keńestiń negizgi atqaratyn jumystaryna toqtalyp ótti.

Onyń aıtýynsha, Qoǵamdyq keńes eń birinshi kezekte halyqpen jumys isteıdi jáne de jaýapty quzyrly organdarǵa jetpeı qalǵan muń-muqtajdyqtar máselesin barynsha sheshýge tyrysady.

Sonymen qatar, Qoǵamdyq keńes múshesi Dáýren Babamuratov Almaty qalasyndaǵy oralmandar máselesine de toqtalyp ótti. Bul rette Qoǵamdyq keńes pen Almaty qalasyndaǵy kóshi-qon basqarmasynyń birlese otyryp jasaǵan jumystary jaıynda aıtyp ótti.

«Almaty qalasy 2011 jyldan bastap osy ýaqytqa deıin oralmandardy qabyldaý statýsynan aıyrylǵan bolatyn. Alaıda, ótken jyldan bastap Almatyda qaıtadan oralmandardy qabyldaý júıeli túrde qolǵa alyndy. Sonyń aıasynda, osy bir jyldyń ishinde barlyq jaǵdaılardy baqylap qarap otyrdyq. Oralman mártebesin alýǵa usynys bergen tulǵalardyń barlyǵy oǵan qol jetkizdi. Bul másele tikeleı bizdiń qaramaǵymyzda boldy. Únemi jaýapty quzyrly organdarmen kezdesip, istiń mán-jaıyn baqylap otyrdyq», - deıdi ol.

Dáýren Babamuratov Almaty qalasy Qoǵamdyq keńesiniń ózge de atqaryp júrgen isterine, qoǵamnyń, ulttyń máselesin sheshýdegi onyń róli jaıynda tolyqqandy baıandap berdi.