Búgin Parlament Májilisiniń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine aqparat jáne komýnıkasıalar máseleleri boıynsha ózgerister men tolyqtyrýlar engizý týraly» zań jobasyn birinshi oqylymda maquldady, dep habarlaıdy Qamshy.kz aqparat agenttigi.

Atalǵan Zań jobasy buqaralyq aqparat quraldary, teleradıo habarlaryn taratý, aqparattandyrý jáne baılanys, aqparattyq qaýipsizdik salasyndaǵy qoǵamdyq qatynastardy quqyqtyq retteýdi qamtamasyz etýge baǵyttalǵan.

«Tutastaı alǵanda, talqylanyp jatqan zań jobasynda úsh úlken salany - aqparat, baılanys jáne aqparattandyrý salasyn damytýǵa baǵyttalǵan keshendi ózgerister qamtyldy. Zań jobasy  aqparat salasynda azamattardyń quqyǵyn qorǵaýdyń mehanızmderin kúsheıtýge;   buqaralyq aqparat quraldary qyzmetinde sapaly ózgerister jasaýǵa; aqparatqa qoljetimdilik boıynsha múmkindikterdi ulǵaıtýǵa; ulttyq zańnamanyń ishki úılesimin qamtamasyz etip, ony qoldanýdyń sapasyn arttyrýǵa múmkindik beredi», - dedi Májilistiń jalpy otyrysynda QR Aqparat jáne komýnıkasıalar mınıstri Dáýren Abaev.

Aqparat jáne komýnıkasıalar máselelerin qamtıtyn bul jobada 12 zań men 4 kodekske ózgertýler men tolyqtyrýlar engizý kózdelgen.

Osy oraıda, Dáýren  Abaev zań jobasynda qarastyrylǵan basty baǵyttarǵa keńirek toqtalyp ótti.

 «Birinshiden, buqaralyq aqparat quraldarynyń damýy úshin sapaly zańnamalyq bazany odan ári nyǵaıtýdy qarastyrylyp otyr. Sonyń ishinde ákimshilik júktemeler men shekteý sharalaryn azaıtý maqsatynda birqatar jeńildikter jasalady. Atap aıtqanda, azdaǵan quqyq buzýshylyqtar úshin gazettiń tırajyn tárkileý nemese BAQ-tyń qyzmetin toqtatý sıaqty jazalardy alyp tastaý kózdelýde. Aqparat quraldaryn shyndyqqa saı kelmeıtin aqparatty taratýǵa qatysty jaýapkershilikten bosatatyn sebepter qatary da ulǵaıady. Bul ózgeris memlekettik organdardaǵy BAQ-pen baılanys jónindegi ókiletti tulǵaǵa jaýapkershilik júkteıdi», - dep túsindirdi Dáýren Abaev.

 Taǵy bir másele buqaralyq aqparat quraldarynda azamattardyń sýretin qandaı jaǵdaıda ruqsat suramaı jarıalaýǵa bolatyny aıqyndaldy. «Mysaly, kópshilik jappaı qatysatyn mádenı, sporttyq jáne basqa da sharalarda jurt aldynda sóz sóıleýge qatysty. Sonymen qatar qatar qazaqstandyq kontentti odan ári qaraı qoldaý maqsatynda memlekettik mekemeler men uıymdarda tek otandyq telearnalardy kórsetý josparlanýda», - dedi mınıstr.

Sonymen qatar, zorlyq-zombylyqtan zardap shekken balanyń jeke basyn anyqtaıtyn kez kelgen aqparatty, onyń sýretin aqparat quraldarynda jarıalaýǵa shekteý usynylyp otyr.

QR Aqparat jáne komýnıkasıalar mınıstri Dáýren Abaev shalǵaı aýdandarda uıaly baılanysty jaqsartýdyń tásili jaıynda túsindirdi.

Osy tusta mınıstr uıaly baılanys operatorlarynan tarıfterdi tómendetýdi talap etetinin atap ótti.

QR Aqparat jáne komýnıkasıalar mınıstri Dáýren Abaev BAQ-pen ózara is-qımyl úshin memorgandardyń jaýapkershiligi artatynyn aıtty.

Atap aıtqanda, memlekettik qyzmetkerlerdiń eńbekaqysy buqaralyq aqparat quraldarynyń saýaldaryna jaýap berý jaǵdaıyna baılanysty bolady. «Qyzmet tıimdiligin baǵalaýdy bonýstyq-baldyq júıege baılanystyramyz. Iaǵnı eger de ol jaýap bermese, onyń reıtıńi tómendeıdi, sáıkesinshe eńbekaqysy da azaıady. Bizde aqparatqa qol jetkizý zańy bar, onda memorgandar qyzmetiniń tıimdiligin baǵalýdy eskeretin bólim qamtylǵan. Basshysy qyzmetkerdiń jumysyndaǵy tıimdiliktiń negizgi kórsetkishin qaraıtyn bolady. Krıterıılerdiń biri retinde BAQ-pen jumys bolady. Sonymen qatar ol ony qyzmetinen de bosata da alady»,-dedi mınıstr.

Sonymen qatar, Dáýren Abaev Qazaqstanda 600 myńǵa tarta otbasy «sur» spýtnıktik tarelkalardy paıdalanyp júrgenin jáne   elimizde 1,5 mıllıon adam qazaqstandyq telearnalardy qaramaıtynyn aıtyp ótti.