Kezdesý barysynda Nursultan Nazarbaev Serikbaı qajy Orazdy Qazaqstannyń Bas múftıi laýazymyna saılanýymen quttyqtady, dep habarlaıdy Qamshy.kz aqparat agenttigi Aqordanyń baspasóz qyzmetine silteme jasap. 

– Men Táýelsizdik kúni qarsańynda Sizdi osyndaı joǵary laýazymǵa saılanýyńyzben quttyqtaý úshin shaqyrdym. Táýelsizdiktiń arqasynda dástúrimizdi qaıta jańǵyrtyp, ata-babamyzdyń dinin ustaný múmkindigine ıe boldyq. Memleket tarapynan kez kelgen azamattyń dinı bostandyǵyn qamtamasyz etý úshin barlyq jaǵdaı jasaldy, – dedi Qazaqstan Prezıdenti.

Elbasy Din isteri jáne azamattyq qoǵam mınıstrligi arqyly dinı qatynastar salasyn retteýde memleket erekshe ról atqaratynyn aıtty.

– Qazaqstan – zaıyrly memleket. Mınıstrlik dinge qandaı da bir shekteý qoıý úshin qurylǵan joq. Mınıstrlik din salasynda tártip ornatyp, din jolyndaǵy adamdar bir-biriniń quqyǵyn buzbaýyn qamtamasyz etý úshin qurylǵan, – dedi Memleket basshysy.

Sondaı-aq, Nursultan Nazarbaev ázirlenip jatqan dinı qyzmet týraly zańnyń negizgi erejelerin keń aýqymda túsindirip, halyqqa jetkizý jóninde birlese jumys júrgizýdiń qajettigine nazar aýdardy.

Budan bólek, Memleket basshysy Qazaqstan musylmandary dinı basqarmasynyń ókilderimen bıylǵy sáýirdegi kezdesýine toqtalyp, onda sanany jańǵyrtyp, elimizdiń tarıhı jáne rýhanı baılyǵyn saqtaý qajettigi talqylanǵanyn atap ótti.

– Patrıotrızm, otandy súıý, elimizdegi jáne óńirdegi turaqtylyq – bizdiń bolashaǵymyzdyń kepili. Sol úshin biz birlese jumys isteýimiz kerek, – dedi Elbasy.

Nursultan Nazarbaev Qazaqstan musylmandary úshin hanafı mazhabynyń dástúrli sıpatyna nazar aýdaryp, bul aǵymnyń mánin uǵyndyrý qajettigin aıtty.

– Din jolyndaǵy adamdardyń arasynda jastar da bar. Meshitterge sán úshin baratyndar da bar, shalbarynyń balaqtaryn qysqartyp, saqal qoıǵan dindarlar da bar. Solardyń bárine ıslam dininiń negizin túsindirý kerek, – dedi Qazaqstan Prezıdenti.

Sondaı-aq, Memleket basshysy radıkaldy dinı aǵymdardy ustanýshylarmen arnaıy túsindirý jumystaryn júrgizý qajettigine nazar aýdardy.

– Dástúrli hanafı mazhabynyń qaǵıdalaryn jáne onyń teris pıǵyldy dinı aǵymdardan aıyrmashylyǵyn túsindirý úshin Quran men hadısterdi biletin bilikti ımamdardy tartý qajet, – dedi Memleket basshysy.

Sonymen qatar Elbasy muqtaj jandarǵa áleýmettik kómek kórsetý úshin ǵana emes, sondaı-aq ǵylymı zertteýler men konferensıalar ótkizip, aqparattyq-túsindirý jumystaryn júrgizý úshin de mesenattyqty damytýdyń mańyzdylyǵyn atap ótti.

Qazaqstannyń Bas múftıi jyly qabyldaǵany úshin Memleket basshysyna alǵys aıtty.

– Qazaqstan musylmandary dinı basqarmasynyń aldynda tarıhı turǵydan qalyptasqan dástúrli dinı mektepti qaıta jańǵyrtýǵa baılanysty úlken mindetter tur, – dedi Serikbaı qajy Oraz.

– Siz «Bolashaqqa baǵdar: rýhanı jańǵyrý» atty maqalańyzda jańa úrdister men álemdegi ózgeristerge bet burý qajettigi týraly aıttyńyz. Búginde bizdiń ımamdar jańa ádebıetterdi zerttep, ýaǵyz aıtý men minajat etý barysynda osy bilimderin qoldanýda, – dedi Bas múftı.

Kezdesý sońynda Nursultan Nazarbaev pen Serikbaı qajy Oraz elimizdegi dinı bilim berý máselesin talqylady.