Búgin «Rixos President Astana» qonaqúıinde «ENSHİ» zıatkerlik-tanymdyq saıysynyń BAQ ókilderine tanystyrylymy ótti, dep jazady Qamshy.kz aqparat agenttigi.
Qazaqstan Respýblıkasynyń Mádenıet jáne sport mınıstrligi Tilderdi damytý jáne qoǵamdyq-saıası jumys komıteti men Shaısultan Shaıahmetov atyndaǵy tilderdi damytýdyń respýblıkalyq úılestirý-ádistemelik ortalyǵynyń tapsyrysymen ázirlengen «ENSHİ» zıatkerlik-tanymdyq saıysy elimizdiń basty arnasy «Qazaqstan» ulttyq telearnasynyń efırinen kórsetilýde. Kez kelgen aýdıtorıaǵa arnalǵan telejoba sanaýly serıasy jarıalanǵanymen óz kórermenin jınap, joǵary reıtıńke jete aldy. Otandyq telejobalar arasynda ózindik ornyn qalyptastyryp úlgergen tanymdyq jobanyń «Rixos President Astana» qonaqúıinde tanystyrylymy ótti.
- Elbasymyz «Bolashaqqa baǵdar: rýhanı jańǵyrý» taqyrybyndaǵy baǵdarlamalyq maqalasynda: «Ájeptáýir jańǵyrǵan qoǵamnyń óziniń tamyry tarıhynyń tereńinen bas¬taý alatyn rýhanı kody bolady. Jańa turpatty jańǵyrýdyń eń basty sharty – sol ulttyq kodyńdy saqtaı bilý», – deı kele, ulttyq sana-sezimniń kókjıegin keńeıtý qajettigin basa aıtqan edi. Bul oraıda óskeleń urpaqtyń tamyryn tereńnen alǵan ulttyq qundylyqtarmen tanystyratyn ári memlekettik tildi nasıhattaıtyn qazaq tildi telejobanyń mańyzy zor. Sondyqtan da biz Qazaqstan Respýblıkasynda tilderdi damytý men qoldanýdyń 2011-2020 jyldarǵa arnalǵan memlekettik baǵdarlamasynda naqtylanǵan basym baǵyttardy júzege asyryp, rýhanı jańǵyrýǵa zor septigin tıgizetin «Enshi» zıatkerlik-tanymdyq telesaıysyn qolǵa aldyq. Telejobanyń basty maqsat-mindeti - qazaqtildi bilimdi jastardy qoldaý, olardyń boıynda pasıonarlyq qýaty bar azamat retinde qalyptasýyna yqpal etý, ulttyq qundylyqtarymyzdy, salt-dástúrimizdi nasıhattaý, memlekettik tildiń nyǵaıa túsýine qyzmet etý bolatyn. Buqaranyń búgingi oń kózqarasy men pikiri bizdiń dittegen mejege jete alǵanymyzdy kórsetedi,- dedi QR Mádenıet jáne sport mınıstrligi Tilderdi damytý jáne qoǵamdyq saıası jumys komıtetiniń bas sarapshysy Oljas Shynjigitov.
Elimizdegi eń bilimdi jasty anyqtaýǵa arnalǵan telejobaǵa 1000-nan astam talapker ótinish bildirgen. Alaıda onyń 48 ǵana telesaıys joldamasyn ıemdengen. Basqosý barysynda aımaqtyq irikteý men qatysýshylarǵa qoıylǵan talap tóńireginde Sh.Shaıahmetov atyndaǵy tilderdi damytýdyń respýblıkalyq úılestirý-ádistemelik ortalyǵy Aqparat jáne monıtorıń bóliminiń basshysy Móldir Baqytqyzy tarqatyp aıtyp berdi.
- «Enshi» zıatkerlik-tanymdyq saıysynyń irikteý kezeńderi Aqtaý, Óskemen, Aqtóbe, Almaty, Shymkent, Qyzylorda, Astana qalalarynda ótti. Ár aımaqtyń bilim basqarmalarymen birlese jumys jasalyp, oblystyń ozattary ǵana irikteýge qatysa aldy. İrikteýdiń ózi eki kezeńnen turdy. Alǵashqy aınalymda talapkerler 30 mınýtta 100 suraqqa jaýap berýi tıis bolsa, budan joǵary bal jınaǵan 12-15 úmitker ǵana ekinshi kezeńge ótti. Ekinshi aınalymda balalardyń qarym-qabiletin, naǵyz bilimi men logıkasyn, psıhologıasyn anyqtaýǵa arnalǵan tapsyrmalar berildi. Arnaıy komısıanyń sheshimimen ár aımaqtan 6 talapker telejoba joldamasyn enshiledi. Sonymen qatar ózge óńirlerdegi oqýshylar men 1-2 kýrs stýdentterin túgel qamtý maqsatynda «yensi.kz» saıtynda onlaın irikteý jarıalandy. Onda 200-den astan ótinim bildirýshiden joǵary upaı jınap, baqylaýshylardyń synynan ótken 1 ǵana qatysýshy telejobaǵa iriktelip alyndy,- dedi ol.
Telearnada kez kelgen baǵdarlamanyń ótimdi bolýy 50 paıyz saýndtrekke baılanysty. Al «Enshi» saıysynyń saýndtregi sátti jazylǵan dep aıtýǵa tolyq negiz bar. Sebebi telesaıys ulttyq qundylyqtar men jańǵyrýǵa negizdelgendikten, saýndtrek pen ár aıdardaǵy trekterde zamanaýı mýzyka men dástúrli mýzyka sátti úndestik tapqan. Sondyqtan brıfıń barysynda «Enshi» zıatkerlik saıysynyń saýndtrek avtory Qurmash Mahanovqa jýrnalıser tarapynan jıi suraq qoıyldy.
- Saýndtrek jazý barysynda reıtıńi joǵary fılmder men serıaldardyń da mýzykasyna asa mán berildi. Sebebi bári aýdıtorıa, tyńdarman úshin jasalatyn bolǵandyqtan, búgingi talǵammen sanasý mindet. Alaıda ózindik boıaýy bolýy kerek. Sondyqtan zamanaýı mýzykaǵa dástúrli ár berildi,- dedi sazger, estrada juldyzy Qurmash Mahan.
Joba ıdeıasynyń avtory Narıman Qoıshybaev erkin formattaǵy brıfıń barysynda telesaıystyń erejesi men formaty týraly aıtyp ótti. Sonymen qatar «Enshi» zıatkerlik saıysynyń ótýine jáne elimizdiń basty telearnasynan kórsetilýine qoldaý kórsetip, muryndyq bolǵan QR Mádenıet jáne Sport mınıstrligi Tilderdi damytý jáne qoǵamdyq-saıası jumys komıteti men Sh.Shaıahmetov atyndaǵy tilderdi damytýdyń respýblıkalyq úılestirý-ádistemelik ortalyǵyna alǵysyn bildirdi.
-Bárińizge belgili, otandyq telearnalarda ıntellektýaldyq saıystar joqtyń qasy. HHİ ǵasyr kóshbasshysynan keıin mektep oqýshylary men stýdentterge arnalǵan zıatkerlik saıys bolmady desek te artyq aıtqandyq emes. Sondyqtan jastardyń bilimge degen qulshynysyn arttyryp, básekege beıimdilikterin baıqatatyn «Enshi» saıysyn uıymdastyrýǵa qoldaý kórsetken, tapsyrys bergen QR Mádenıet jáne Sport mınıstrligi Tilderdi damytý jáne qoǵamdyq-saıası jumys komıteti men Sh.Shaıahmetov atyndaǵy tilderdi damytýdyń respýblıkalyq úılestirý-ádistemelik ortalyǵyna úlken rahmet aıtamyn,- dedi ol.
Erkin formattaǵy brıfıń sońynda áleýmettik jelilerdegi «Enshi» paraqshasynda jýrnalıser men blogerlerge arnalǵan saıys jeńimpazdary marapattaldy. BAQ ókilderi arasynda uıymdastyrylǵan baıqaý jeńimpazy bolyp «Astana» radıosynyń jýrnalısi Janat Qabyldauly tanyldy. Al ekinshi oryndy «Elana» saıtynyń tilshisi Erqazy Seıtqalı enshilese, úzdik úshtik qataryn «Bilim aınasy» gazetiniń jýrnalısi Jansaıa Mustafına tolyqtyrdy.
