Bir jylǵa jýyq ýaqyt qoǵamda qyzý talqylanyp, qoldanystaǵy quqyqtyq qujattarǵa 300-ge jýyq ózgertý engizilgen BAQ týraly zań búgin Parlament Senatynyń ekinshi oqylymynda maquldandy. Bul týraly Qamshy.kz aqparat agenttigi 24.kz-ke silteme berip habarlaıdy. Jıynda jaýapty sala basshysy jańashyldyqtardy jan-jaqty baıandady.
Onyń aıtýynsha, zań jobasy arqyly tulǵa men redaksıa arasyndaǵy dálelsiz aqparatqa qatysty daý-damaılardy sotqa deıin sheshý tártibi ázirlengen. Sondaı-aq telearnalar múmkindigi shekteýli azamattar úshin sýbtıtr men sýrdoaýdarmany qoldaný qajettigi eskerildi. Aqparat quraldarynda azamattardyń sýretin olardyń ruqsatynsyz jarıalaý múmkindigi de paıda boldy. Bul rette tek zardap shekken bala týraly jeke málimetter onyń óziniń nemese zańdy ókilderiniń kelisiminsiz qoldanylmaýy qajet. Al buqaralyq aqparat quraldary úshin memlekettik organnan resmı málimet alý merzimi qysqarmaq.
Baqytjan Jumaǵulov, QR Parlamenti Senatynyń depýtaty: - BAQ-tyń aýyzsha jáne jazbasha suraý salýlary boıynsha olarǵa aqparat berý prosesi rettelgen. BAQ pen jumysty júzege asyrý jónindegi ókiletti tulǵalardyń nemese bólimshelerdiń fýnksıalary alǵash ret zańnamalyq turǵydan naqtylanǵan.
Dáýren Abaev, QR Aqparat jáne komýnıkasıalar mınıstri: - Qoryta aıtqanda, zań jobasynda 16 zańǵa, 6 kodekske 280-nen astam ózgeris pen tolyqtyrý engizý qarastyrylyp otyr. Baspa BAQ úshin taǵy bir jeńildik gazettiń nemese jýrnaldyń ókiletti organǵa ótkizetin mindetti danasyn endi elektrondy túrde tapsyrýǵa ruqsat berilmek.
