Búgin QR Mádenıet jáne sport mınıstri Arystanbek Muhamedıuly ýakraınalyq «Golos. Ditı» shoýynyń jeńimpazy Danelıa Tóleshovamen kezdesti, dep jazady Qamshy.kz aqparat agenttigi.
Kezdesý barysynda Arystanbek Muhamedıuly Danelıa Tóleshovany «Golos. Ditı» shoýyndaǵy jeńisimen quttyqtady. «Mádenıet jáne sport salasyndaǵy kez-kelgen jetistikter Qazaqstan úshin óte mańyzdy. Danelıa, quttyqtaımyz seni. Danelıany Elbasymyzdyń jáne búkil qazaqstandyqtar atynan úlken jetistigimen quttyqtaımyz» - dep atap ótti mınıstr.
Kezdesý barysynda Danelıa Tóleshova mádenıet jáne sport mınıstrligine alǵys bildirip, jaqynda ótken televızıalyq shoý jaıly áserimen bólisti, óziniń josparlary týraly aıtyp ótti.
Esterińizge sala keteıik, almatylyq 11 jasar Danelıa Tóleshova Ýkraınadaǵy «Golos. Ditı» án baıqaýynda jeńiske jetken edi. Ol aqtyq synda Okean Elzy tobynyń «Ne tvoıa viına» ánin ýkraın tilinde oryndady.
Danelıa Tóleshova Dımash Qudaıbergen, Polına Gagarına, Anı Lorak sıaqty óner juldyzdarymen birge án aıtýdy armandaıdy. QR Mádenıet jáne sport mınıstrliginiń mádenı is-sharalarynyń turaqty qatysýshysy Danelıa 2015 jyly «Aıalaǵan Astana - 2015» balalar mýzykalyq konkýrsynyń Gran-prı ıegeri jáne kórermender kózaıymy. 2017 jyly «Baıqońyrdyń jarqyn daýystary» halyqaralyq festıvaliniń laýreaty, 2017 jyly Tbılısıde ótken (Grýzıa) «Balalar Evrovıdenıesindegi» «qazaqstandyq saǵattyń» qatysýshysy.
