Pavlodar qalasynyń tártip saqshylary meshitke kelgen adamdardyń qaltasynan aqsha urlap júrgen uryny qolǵa túsirdi, dep habarlaıdy QazAqparat Pavlodar oblysynyń İİD baspasóz qyzmetine silteme jasap. Vedomstvonyń habarlaýynsha, polısıaǵa jergilikti meshitterdiń birine baryp júretin eki adam aryzben júgingen. Olardyń aıtýy boıynsha, belgisiz adamdar meshittiń kıim iletin oryndarynda ilýli turǵan kúrtesheniń qaltasynan aqsha, bank kartalaryn jáne basqa da baǵaly zattardy urlaǵan. «Jábirlenýshiniń aıtýynsha, belgisiz adamdar onyń kúrteshesinen bylǵary portmone, 60 myń teńgege jýyq aqshalaı qarajat jáne qujattardy urlaǵan. Birneshe kúnnen keıin polısıaǵa osyǵan uqsas aryzben taǵy bir jábirlenýshi júgindi.

Ol jergilikti meshitterdiń birinde barsetkasynyń, 15 000 teńge aqshasynyń urlanǵanyn aıtty», - dep habarlaıdy Pavlodar oblysynyń İİD baspasóz qyzmetinen. Jedel-izdestirý is-sharalary barysynda osy qylmysty jasady degen kúdikpen 1994 jyly týǵan Pavlodar qalasynyń turǵyny ustaldy. Kúdikti óz kinásin tolyǵymen moıyndap, istegen isine ókinetinin aıtqan. «Tergeý barysynda kúdiktiniń meshitke kirip, kelýshilerdiń ańqaýlyqtaryn paıdalana otyryp, kire beriste tastap ketken syrtqy kıimderdiń qaltasynan urlyq jasaǵandyǵy anyqtaldy. Keıin kózge túspeı qylmys ornynan izin sýytqan. Qazirgi ýaqytta polıseıler onyń oblys ortalyǵy aýmaǵynda jasalǵan uqsas qylmystarǵa qatystylyǵyn tekserýde», - delingen habarlamada. Atalǵan jaǵdaı boıynsha Qazaqstan Respýblıkasy Qylmystyq kodeksiniń 188-baby boıynsha sotqa deıingi tergeý bastaldy.