AQSH federaldyq tergeý búrosy (FBR) agentteri San-Fransısko qalasyndaǵy týrısik nysanǵa shabýyl jasamaqshy bolǵan degen kúdikpen er adamdy tutqyndaǵan. Prokýratýra ókilderiniń boljamy boıynsha, Kalıfornıa shtatyndaǵy Modesto qalasynda turatyn 26 jastaǵy Everıtt Djeımson "jıhadshylar ıdeıasyn jaqtap, Rojdestvo merekesi kúni shabýyl jasaýdy josparlaǵan", dep Qamshy.kz aqparat agenttigi Azattyqqa súıenip jazady.
Djeımsonǵa ózderin "jıhadshylarmyz" dep tanystyrǵan FBR agentteri onymen birneshe ret baılanysqan. Kúdikti San-Fransıskoda jurt kóp baratyn jaǵalaýda ornalasqan týrısik aýdanda jarylys jasap, keıin adamdarǵa avtomattyq qarýdan oq atý josparymen bólisken. Aıyptaý qorytyndysynda Djeımsonnyń "terakt jasaýdy josparlaǵan aýdandy jaqsy biletini" jáne ol jerde únemi adam kóp júretinine senimdi bolǵany aıtylǵan. Sonymen birge kúdikti shabýyldan soń eshqaıda qashpaı, "ólimdi qabyldaýǵa daıyn" ekeni týraly málimdegen.
Biraq keıin FBR agentimen telefon arqyly sóılesken kezde Djeımson shabýyl jasaý qolynan keletinine kúmándi ekenin aıtyp, áýelgi oıynan aınyp qalǵanyn jetkizgen.
Kúdiktiniń úıin tintý kezinde atys qarýy men oq-dári, sonymen birge aldyn ala ázirlegen ósıeti tabylǵan. Ósıetinde ol AQSH prezıdenti Donald Trampty Ierýsalımdi Izraıldiń astanasy dep taný týraly sheshimi úshin aıyptaǵan.
Juma kúni federaldyq sotta Everıtt Djeımsonnyń qorǵaýshysy kúdiktige taǵylyp otyrǵan aıyptardy joqqa shyǵardy. Kúdiktiniń ákesi ulynyń "teraktige daıyndalǵany" týraly aqparatqa sengisi kelmeıtinin aıtqan.
2009 jyly Djeımson teńiz jaıaý áskeri korpýsynda qysqa daıyndyq kýrsynan ótken. Biraq densaýlyǵyna qatysty málimetti – demikpe aýrýyna shaldyqqanyn jasyryp qalǵany anyqtalǵan soń bosatylǵan.
Buǵan deıin "Islam memleketi" ekstremıstik toby óz jaqtastaryn Batys elderinde Rojdestvo merekesi kezinde terrorlyq shabýyldar jasaýǵa shaqyrǵan.
