Altynshy synypta oqıtyn almatylyq oqýshy Mıras Kósherbaev shaǵyn qus fabrıkasyn ashyp, jeke kásibin bastady, dep habarlaıdy «QazAqparat» HAA tilshisi. Mıras ár kún saıyn óziniń qus fabrıkasynyń jumysyn tekserip baryp qana mektepke jol tartady. Bul týraly Qamshy.kz aqparat agenttigi QazAqparatqa siltep jazady.
Jas ta bolsa jalyndy óren «Tamos» fızıka-matematıka baǵytyndaǵy mekteptiń 6-shy synyp oqýshysy. Jas bala kishkentaı kezinen-aq kvadrasıkl satyp alýdy armandaǵan eken. Mırastyń ájesi nemeresine kvadrasıkldy satyp alýǵa «aqshany óziń taýyp alsań qalaı?» dep usynys bildiripti.
Tipti ájesi kásip bastaý úshin alǵashqy qarjyny nemeresiniń qolyna ustatyp, aqyry Mıras bul jumysqa úlken jaýapkershilikpen kirisip ketken. «Úıdiń aýlasynda bos jatqan úlken alań bar. Mıras óziniń kásibi úshin osy aýmaqty paıdalanýdy sheshti. Jazǵy demalysynda fazendada ákesine kómektesti. Ákesi mal ustap, kóp bolmasa da taýyq asyraıtyn edi. Osy sebepti, Mıras taýyq asyraýǵa maqsatty túrde kiristi», - deıdi jas kásipkerdiń ápkesi Gúzál Saǵyntaeva.
Jańasyn satyp alýǵa qaltasy kótermegendikten, Mıras balapandardy asyraýǵa arnalǵan brýderlerdiń (jyly orynǵa qoıylatyn qorap) syzbasyn ınternetten kórip, balapandarǵa arnalǵan jyly «mekenjaıdy» óz qolymen jasap alǵan. «Mırastyń kásibi osylaı ilgeri basty. Aldymen 100 balapan satyp aldy. Bul onyń birinshi partıasy bolatyn. Qajetti jemdi ár túrli jetkizýshilerden aldy. Balapandarǵa talapqa saı keledi degen jemdi berdi. Taýyqtarǵa antıbıotık nemese garmondardan tys, tek ekologıalyq taza jem túrlerin beredi.
45-50 kún asyraǵannan keıin týystaryna satady. Birinshi partıadan túsken aqshaǵa Mıras taǵy 200 balapan satyp aldy», - deıdi Gúzál Saǵyntaeva. Qazir bala kásipker tipti bir adamdy jumysqa ornalastyryp qoıypty. Maqsaty - taýyqtyń sanyn myńǵa jetkizip, qaz, úırek, kúrketaýyq sekildi ózge de úı qustaryn ósirý.
Sonymen birge, Mıras aýyl sharýashylyǵy ónimderin saýdalaıtyn jeke dúkenin ashýdy kózdep otyr. «Mırastyń kishkene kezinen eńbekke degen qulshynysy erekshe. Ózi de mal baǵyp ósken bala. Atamyz belgili agronom Shynybek bárimizdi jazda aýyldaǵy jumysqa kómek qolyn sozýǵa úıretken. Otbasymyzdyń eńbekke áýes bolýynyń sebebi sol atamyzdyń tárbıesi dep oılaımyn», - deıdi Gúzál Saǵyntaeva.
