Qonaev qalasynda 2026 jylǵa arnalǵan jospar naqty aıqyndaldy. Bul týraly qala ákimdiginiń ekonomıka jáne qarjy bólimi habarlady.
Bıylǵa josparlanǵan sharalar qalanyń ınfraqurylymyn júıeli jańǵyrtýǵa, qala men aýyldyq okrýgtiń teńgerimdi damýyn qamtamasyz etýge baǵyttalǵan.
Keshendi damý jospary: qala ınfraqurylymyn jańǵyrtýdyń ózegi
Negizgi basymdyqtardyń biri – keshendi damý josparyn iske asyrý. 2026 jyly bul baǵytta Qonaevta birqatar mańyzdy jobalar júzege asyrylmaq. Elektr energıasymen qamtý maqsatynda «Arna» qosalqy stansıasynyń qurylysy jalǵasyn tabady. Bul nysan bolashaqta qalanyń jańa turǵyn úı massıvteri men áleýmettik nysandaryn turaqty jaryqpen qamtamasyz etýge múmkindik beredi.
Sonymen qatar kólik qozǵalysyn jaqsartý jáne jol júktemesin azaıtý úshin M.Áýezov kóshesin jańǵyrtý kózdelip otyr. Joba aıasynda jol eki jolaqtydan tórt jolaqtyǵa deıin keńeıtiledi.
Aýyldyq eldimekenderdiń ınjenerlik ınfraqurylymyna da aıryqsha nazar aýdarylýda. Kerbulaq jáne Sarybulaq aýyldarynda aýyz sý júıeleri jańǵyrtylyp, turǵyndardy sapaly aýyz sýmen qamtý deńgeıi artady. Al Sheńgeldi aýylynda kósheler jaryqtandyrylyp, joldar ortasha jóndeýden ótedi. Bul sharalar aýyl turǵyndarynyń qaýipsizdigi men turmys sapasyn jaqsartýǵa baǵyttalǵan.
Budan bólek, turǵyn úı-kommýnaldyq sharýashylyq salasy boıynsha 30-dan astam joba, sondaı-aq jol-kólik ınfraqurylymyn jaqsartýǵa arnalǵan 5 joba memlekettik saraptamadan ótkizýge usynylady. Bul – aldaǵy jyldary qalanyń damý áleýetin arttyratyn mańyzdy qadam.
Qurylys salasy: qaýipsizdik pen qolaıly qala qurý
Qoǵamdyq tártip pen qaýipsizdikti nyǵaıtý maqsatynda 10-shaǵynaýdanda ýchaskelik polısıa pýnktiniń ákimshilik ǵımaraty salynady.
Sondaı-aq týrısik jáne qoǵamdyq áleýeti joǵary «Kóshpendiler qalashyǵyn» qaıta jańǵyrtý úshin jobalyq-smetalyq qujattama ázirlenedi. Joba týrısik áleýetti arttyrady dep kútilýde.
«Vostochnyı» shaǵynaýdanyndaǵy úsh kóshege ınjenerlik-kommýnıkasıalyq ınfraqurylym júrgizý úshin de JSQ daıyndalady.
Injenerlik jeliler men abattandyrý
Qala aýmaǵynda ınjenerlik komýnıkasıalardy jańartý jáne qoǵamdyq keńistikterdi abattandyrý jumystary júıeli túrde jalǵasady. Atap aıtqanda, №6 jáne №7 jaǵajaılardy abattandyrý jumystary júrgizilip, turǵyndar men qala qonaqtaryna qolaıly demalys aımaǵy qalyptastyrylady.
Sýmen qamtý boıynsha alty sý uńǵymasyn salýǵa arnalǵan jobalyq-smetalyq qujattar ázirlenedi. Sonymen qatar Qonaev qalasynda jasyl jelekterdi avtomattandyrylǵan sýarý júıesin engizý úshin de qujat daıyndalady. Atalǵan shara kógaldandyrý jumystaryn tıimdi júrgizýge múmkindik beredi.
Jaryqtandyrylmaǵan kóshelerge jaryq baǵanalary men shamdar ornatylyp, turǵyn úılerdiń shatyrlary men qasbetteri jóndeledi. Qala aýmaǵynda jasyl jelekterdi bıologıalyq óńdeý, masa men kemirgishterge qarsy sanıtarlyq jumystar júrgiziledi.
«Halyq qatysatyn búdjet» jobasy aıasynda turǵyndardyń usynystary negizinde ortaq paıdalanylatyn aýmaqtardy abattandyrý jalǵasady. Sonymen qatar qoǵamdyq oryndardy tazalaý, saıabaqtardy kútip ustaý jáne kógaldandyrý jumystary da atqarylady. Buǵan qosa, qaladaǵy bes shaǵynaýdandy gazdandyrý jumystary aıaqtalmaq.
Jol-kólik ınfraqurylymyn damytý
Qonaev qalasy men Sheńgeldi aýyldyq okrýginiń eldimekenderinde jańa avtobýs aıaldamalary ornatylady. Qala joldarynda aǵymdaǵy jáne shuńqyrlardy jamaý jumystary júrgizilip, qozǵalys qaýipsizdigi artady.
İle ózeni arqyly «Tańbaly tas» pen «Kóshpendiler qalashyǵyn» baılanystyratyn jaıaý júrginshiler kópirin salýǵa jobalyq-smetalyq qujattama ázirleýge qarjy bólindi.
Jolaýshylar tasymaldaý shyǵyndaryn sýbsıdıalaýǵa 372,6 mln teńge baǵyttaldy. Al áleýmettik osal sanattaǵy azamattardyń qoǵamdyq kólikte jeńildikpen jáne tegin júrýin qamtamasyz etý úshin 72,3 mln teńge qarastyrylǵan.
Aýyldyq okrýgter men áleýmettik qoldaý
Aýyldyq aýmaqtardy damytý da basty nazarda. Sheńgeldi aýyldyq mádenıet úıine kúrdeli jóndeý júrgizý úshin jobalyq-smetalyq qujattama ázirlenip jatyr. Kerbulaq, Sheńgeldi jáne Qosqudyq aýyldarynda balalar oıyn alańdary salynyp, eldimekenderge 66 beınebaqylaý kamerasy ornatylady.
Sonymen qatar «Dıplommen aýylǵa» jobasy aıasynda densaýlyq saqtaý, bilim berý, mádenıet, sport, áleýmettik qamsyzdandyrý jáne agroónerkásip salasynyń mamandaryna qoldaý kórsetiledi. Bul maqsatqa 9,5 mln teńge bólinip, jas mamandarǵa 100 AEK kóleminde kóterme járdemaqy tólenedi. Turǵyn úı satyp alý nemese salý úshin 2026 jyly 69,2 mln teńge kóleminde búdjettik kredıt qarastyrylǵan.
Halyqty áleýmettik qamsyzdandyrý salasyndaǵy jumystar da aldaǵy jyly júıeli túrde jalǵasyn tabady.
Osylaısha, Qonaev qalasynda 2026 jylǵa arnalǵan josparlar tek jekelegen salalardy qamtyp qana qoımaı, qalanyń uzaqmerzimdi damýyna negiz bolatyn keshendi baǵyttardy kózdeıdi.
2026 jylǵa aıqyndalǵan mindetter memlekettik saıasattyń basym baǵyttarymen úndesip, halyqtyń kúndelikti ómirinde seziletin naqty nátıjelerge baǵyttalǵan. Qalanyń damý jospary kezeń-kezeńimen júzege asyrylady.