Qazaqstan prezıdenti Nursultan Nazarbaev Reseı prezıdenti Vladımır Pýtın 2018 jyly naýryzda ótetin prezıdent saılaýynda basty kandıdat bolady degen pikir bildirdi. Nazarbaev bul jaıynda qazaqstandyq BAQ ókilderimen ótken jabyq kezdesýinde aıtty dep habarlaıdy Qamshy.kz aqparat agenttigi Azattyqqa silteme jasaı otyryp.
- Vladımır Pýtın prezıdenttikke usynyldy, oǵan árqashan sáttilik tileımin. Menińshe, ol - osy saılaýdaǵy favorıt. Reseı Eýropa elderi men AQSH-tyń qysymyna ushyraǵan mundaı qıyn kezeńde Pýtın memleket qaıratkeri retinde buǵan tózedi jáne halyqty alǵa bastaı alady, - dedi Nazarbaev.
Qazaqsan prezıdenti sonymen qatar Qazaqstan men Reseı arasyndaǵy "qazirgideı qarym-qatynasty saqtaý keregin" aıtty.
Vladımır Pýtın Reseı prezıdenti saılaýyna tórtinshi márte túseıin dep otyr. 2008-2012 jyldary premer-mınıstr bolǵan kezin qosa eseptegende, Pýtınniń bılikte otyrǵanyna 18 jyl toldy. Nursultan Nazarbaevtyń Qazaqstandy basqaryp kele jatqanyna 28 jyl boldy.
