Qazaqstan Prezıdenti Nursultan Nazarbaev otandyq jýrnalıserge bergen suhbatynda turǵyn úı máselesi jaıynda pikir bildirdi, - dep habarlaıdy Tengrinews.kz.
Memleket basshysy turǵyn úı máselesiniń barlyq elde bolǵanyn jáne áli de baryn atap ótti.
"Biz tolyqtaı ýrbanızasıalanǵan el emespiz. Bizde halyqtyń 40 paıyzyna jýyǵy aýyldyq jerlerde turady, al aýylda jumys isteıtinderdiń úlesi 20 paıyz ǵana. Olar qalalarǵa kelip jatyr. Qazir bizde "Turǵyn úı qurylys jınaq" bar. Adam belgili bir somany jınaıdy - 50 paıyz, qalǵanyn bank kredıtke beredi de, ol páter satyp alady, keıin tóleı bastaıdy", - dedi Elbasy.
Memleket basshysy qazaqstandyqtarǵa usynylyp otyrǵan jalǵa beriletin baspananyń qaǵıdasyn túsindirdi. "Keıingi satyp alý quqy joq jalǵa beriletin baspanalarǵa muqtajdar - múgedekter, soǵys ardagerleri, bul sanatta mundaı baǵdarlamada keıingi satyp alý múmkindigi joq. Úshinshisi - jeke turǵyn úı qurylysy: 10 sotyq jer beriledi de, ózi úı salady", - dep mysal keltirdi Nazarbaev.
Prezıdent qazirgi tańda jumysy bar kez kelgen adamnyń baspana alýǵa múmkindigi baryn aıtty.
"Bir úıde eki adam jumys istese, ıpoteka tóleı alady. Biraq jumys isteıtin adam ǵana baspanaly bola alady. Esh jerde jumys istemeseń, bireý saǵan páter bere sala ma? Mundaı bolmaıdy. Qazirgi naryq jaǵdaıynda memleket tegin bere almaıdy jáne bermeýi tıis. Biraq memleket mundaı azamattarǵa kómektesip, paıyzdyq mólsherlemesin azaıtady. Ákimdikter jalǵa beriletin baspana qurylysyna tómen mólsherlememen bóledi. Bul az qamtylǵan jáne kópbalaly otbasylarǵa kórsetilip jatqan kómek", - deıdi Prezıdent.
"Halyq osyny bilip, tórt baǵdarlamaǵa qatysýy kerek: árkim ózine qolaılysyn tańdasyn. Qolymyzǵa qaryndash alyp sanadyq. Memlekettiń basty mindeti - halyqqa jumys berý. Adam jumys istep, paıda tabýy tıis. Eger ol bizdiń jaǵdaıda, ındýstrıaldyq ekonomıka jaǵdaıynda jumys istese, ıpoteka, kredıt tóleıtin qarajaty bolyp, baspanaly bolatyn múmkindigi bar. Halyq sany artyp jatyr, bala týý kórsetkishi ósip keledi. Bul másele árdaıym bola beredi. Biz osy máseleni sheshý úshin júrmiz", - dep qorytyndylady Memleket basshysy.
