Shyǵys Qazaqstan oblysynda balamaly energıany paıdalaný boıynsha birqatar jobalar júzege asyrylýda. Oblys ákimi Danıal Ahmetovtiń aıtýynsha, bul jobalar «EKSPO-2017» halyqaralyq kórmesiniń jetekshi baǵyty bolyp tabylatyn jasyl ekonomıkany damytý maqsatynda júzege asyrylýda. Bıyl oblysta kún, jel jáne sý elektr stansalarynyń qurylysy aıaqtalady dep josparlanyp otyr.
Shyǵys Qazaqstanda jel, kún jáne sý elektr stansalaryn salý ıdeıasy ózekti, óıtkeni óńirdiń bul turǵyda áleýeti jetkilikti. 2018 jyly «jasyl» stansalar Jarma, Ulan jáne Zyrán aýdandarynda paıda bolady. Qazirgi kúni Zyrán aýdanyndaǵy Turǵusyn ózeninde Turǵusyn GES-1 qurylysy qarqyndy júrip jatyr. GES-te óndiriletin ortasha jyldyq energıa – 79,8 mln. KVt.
Sondaı-aq balamaly qýat kózin paıdalaný baǵytynda Jarma aýdanynda eki joba qolǵa alynǵan. Olar: Shar kentinde salynyp jatqan jel elektr stansasynyń qurylysy men Janǵyztóbe kentinde salynatyn qýaty 25 MVt-tan 200 MVt-qa deıin jetetin jel elektr stansasy. Sondaı-aq osy eldi mekende jylyna 30 megavatt qýattylyǵy bar kún elektr stansasynyń qurylysy aıaqtalýda. Aıta ketsek, bul joba Energetıka mınıstrliginiń energıa óndiretin uıymdar tizimine engizilgen.
Sondaı-aq Ulan aýdanynyń Taıynty aýylynda «Taıynty JES» jobasy iske asyrylýda. Onyń qýaty shamamen 25 MVt bolady. Mundaǵy basty artyqshylyq – jel qondyrǵylary ekologıalyq jaǵynan taza, aýany lastamaıdy.
- Jarma, Zyrán jáne Ulan aýdandarynyń ákimderi osy jobalardy júzege asyrý boıynsha aı saıyn kezdesýler ótkizip, olarǵa jan-jaqty qoldaý kórsetýi kerek, - dedi Danıal Ahmetov. - Óıtkeni, biz «EKSPO 2017» halyqaralyq kórmesiniń jetekshi baǵyty bolyp tabylatyn «jasyl» ekonomıkany damytý aıasynda osy jobalardy is júzine asyryp jatyrmyz.
Jel týrbınalary, kún qondyrǵylary jáne jańa sý elektr stansalary bıyl aımaqtaǵy energıa tapshylyǵyn joıyp qana qoımaı, kórshi aımaqtardy arzan elektr qýatymen qamtamasyz etedi.
Jalpy aıta ketsek, «EKSPO-2017» - bul tek «jasyl» energetıka ǵana emes, sonymen qosa ekologıalyq taza óndiris tehnologıalary. EKSPO kórmesinde 140 jýyq ǵylymı ónertabys kórsetilse, Shyǵys Qazaqstannan 6 joba usynyldy.
Aıta keteıik, Astanada ótken EKSPO kórmesin Shyǵys Qazaqstan oblysynan barlyǵy 30 myńǵa jýyq oqýshylar men stýdentter tamashalap qaıtty.
