Bas múftı Serikbaı qajy Oraz «Áziret Sultan» meshitinde aqsham namazynan keıin jamaǵatpen júzdesip, «Qurannyń ómirlik qaǵıdalary» taqyrybynda ǵıbratty ýaǵyz aıtty, dep jazady Qamshy.kz aqparat agenttigi muftyat.kz málimetine súıenip.
Bas múftı ýaǵyzynda Quran – sońǵy paıǵambarmen kemeline jetken eń uly din – Islamnyń kitaby ekenin, sondyqtan Ol barsha adamzatqa, búkil ǵasyrda ári barlyq ǵylymı deńgeıde tálim úıretetini týraly oılaryn paıymdy tujyrymdarmen jetkizdi.
«Quran adamzatqa amanat. Ol – ǵylym men bilim, tálim-tárbıe. Quran Kárim – ómirdiń barlyq salasyn qamtyǵan, adamdardy zulymdyqtan, nadandyqtan qorǵap, jaqsylyqqa bastaıtyn kemel kitap. Qazirgi kóptegen ǵalymdar óziniń zerttegen ǵylymı jumystarynyń jaýabyn osy Qurannan taýyp jatqany da jasyryn emes. Óıtkeni, ǵylym bolashaq jaıly tujyrym jasamaı, tek nátıjelerdi ǵana aıta alady. Al, Quran tańǵajaıyp muǵjıza retinde ǵasyrlar buryn aıtqan anyqtamalary ǵylymda aına qatesiz oryndalyp jatyr», dedi Bas múftı.
Sondaı-aq, Bas múftı Serikbaı qajy Oraz qasıetti Quran qoǵamdyq ómirdiń barlyq salasyn qamtıtyny jaıly aıtyp ótti.
«Adamzatty nadandyq shyrmaýynan qutqaryp, qarańǵylyqtan nurǵa bastaý úshin jiberilgen qasıetti Quran Kárim – jol kósetýshi nur. Quranda nápsi tárbıesi, ar-ojdan tazalyǵy, óz-ózine esep berý, januıany basqarý, bala tárbıesi, áleýmettik qatynastar, ádeptilik qaǵıdalary, adamgershilik normalary, ekonomıka, jaratylys zańdylyqtary, ǵylym salalarynyń negizderi sıaqty kóptegen jaıttar qamtylǵan. Quran oqylǵan, oǵan amal etilgen úıde, jerde, elde tynyshtyq ornaıdy, Allanyń bereketi bolady», dep atap ótti Bas múftı Serikbaı qajy Satybaldyuly.
