Jyl basy qańtarda birqatar zańdar óz kúshine endi. Máselen, kólik júrgizýshilerine salynatyn aıyppul kólemi tómendeıdi. Ol boıynsha kólik tizgindegenderge birqatar jeńildikter qarastyrylǵan. Sonymen qatar, bıyldan bastap pedofılder hımıalyq jolmen jazalanady. Al, qańtardyń birinen eń tómengi jalaqy men zeınetaqy kólemi de ózgerdi dep habarlaıdy Qamshy.kz aqparat agenttigi Astana ákimdiginiń baspasóz qyzmetine silteme jasaı otyryp.

Máselen, kóligin múgedekterge arnalǵan turaqqa qańtarǵandarǵa birinshi qańtardan bastap 22 myń teńge aıyppul salynady. Osyǵan deıin onyń kólemi 113 myń teńge bolatyn. Al, qarsy jolaqqa shyqqan kólik ıeleri osyǵan deıin bir jylǵa júrgizýshi kýáliginen aıyrylsa, endi eki aı kólik tizgindemeıdi. Mashına shamyn jaqpaý sekildi usaq jol erejelerin buzǵandarǵa endi jol-patrýldik polısıasy tek eskertý jasaıtyn boldy.

Pedofılderdi hımıalyq pishtirý jazasy 2018 jyldyń birinshi qańtarynan kúshine endi. Hımıalyq kastrasıa qoldanýdy sot sheshedi. Túrmede pedofılge erkektik qýatyn álsiretetin dári egiledi. Sonymen qatar, sottalýshy bostandyqqa shyqqannan keıin de 3 jyl qatań baqylaýda bolady.

It jylyndaǵy taǵy bir jaǵymdy jańalyq, shildeden bastap elimizde  bazalyq zeınetaqy men járdemaqy 8 paıyzǵa ósedi. Osylaısha, zeınetaqynyń tómengi mólsheri 49 myń, ortasha kólemi 71 myń teńge bolmaq. Sondaı-aq, eń tómengi kúnkóris deńgeıi 28 myń teńgege deıin kóterildi.