Elimizde 1 qańtardan bastap QR normatıvtik quqyqtyq aktilerindegi salyq salý máseleleri jónindegi túzetýler kúshine endi, sáıkesinshe mindetti áleýmettik medısınalyq saqtandyrýdy engizý merzimi 2018 jyldan 2020 jylǵa aýystyryldy.

MÁMS júıesine jeke tulǵalardyń (jaldamaly jumyskerler, ózin-ózi qamtýshylar, onyń ishinde jeke kásipkerler, azamattyq-quqyqtyq sıpattaǵy kelisimsharttaǵy tulǵalar) jarna tóleý merzimi 2020 jyldyń 1 qańtaryna aýystyryldy.

- Osy ýaqyt aralyǵynda halyqtyń ózin-ózi ónimsiz qamtamasyz etetin sanatyn rásimdeý jáne olardy el ekonomıkasyna, sáıkesinshe MÁMS júıesine tartý jumystary júrgiziletin bolady. 2020 jyldan bastap osy sanattaǵy tulǵalar úshin MÁMS júıesine tólenetin jarna mólsheri tómendeıdi. Azamattyq-quqyqtyq sıpattaǵy kelisimshart boıynsha tabys alatyn jeke tulǵalardyń jarna mólsheri (jarna esepteý obektisinen) 2020 jyly 1 %-ti, al 2021 jyldan bastap 2%-ti quraıdy, - deıdi Astana qalasy boıynsha «ÁMSQ» komersıalyq emes aksıonerlik qoǵamy fılıalynyń dırektory N.Qabdyqaparov.

Sonymen qatar, jeke kásipkerler 2018-2019 jyldary jeke kásipkerler retinde ózi úshin jarna tólemeıdi. Biraq jumys berýshi retinde qaramaǵyndaǵy jumyskerleriniń atyna jarna aýdarýdy toqtatpaıdy, jarna mólsheri 2018-2019 jyldary - 1,5%-ti, 2020 jyldan bastap 2%-ti quraıdy.

2017 jyldyń 1 shildesinen bastap aı saıynǵy jarna aýdarýdy bastaǵan jumys berýshiler saqtandyrý keıinge qaldyrylǵanyna qaramastan, óz qyzmetkerleri úshin ótken jyldyń jeltoqsan aıyndaǵy tólemderin 2018 jylǵy qańtarda aıaqtaýy tıis. Atap aıtqanda, jalpy tártip boıynsha jumys isteıtin jeke kásipkerler 2017 jyldyń jeltoqsan aıy úshin tólenetin sońǵy jarnany 2018 jyldyń qańtarynda aýdarýlary qajet. Jeńildetilgen deklarasıa boıynsha arnaıy salyq júıesindegi jumys isteıtin jeke kásipkerler 2017 jyldyń shilde-jeltoqsan aılary úshin jarna aýdarady. Iaǵnı, sońǵy soma 2018 jyldyń 25 aqpanynan keshikterilmeı tólenedi.

Jumys berýshiler úshin jarna tóleý tártibi ózgergen joq, olar 2018-2019 jyldary - 1,5%, 2020 jyldan bastap 2% mólsherinde jarna tóleıdi.

- Jeńildigi bar sanattar úshin jarnany memleket tóleıdi, onyń mólsheri 2020 jyly memlekettik statısıka organy tarapynan ótken eki jylǵa bekitilgen ortasha aılyq jalaqynyń 4%-in quraıdy. Atalǵan sanattarǵa jatpaıtyn tulǵalar 2020 jyldan bastap eń tómengi jalaqynyń 5 %-i kóleminde jarna aýdarady, - deıdi Astana qalasy boıynsha «ÁMSQ» komersıalyq emes aksıonerlik qoǵamy fılıalynyń dırektory N.Qabdyqaparov.

2018 jyldyń 1 qańtarynan Áleýmettik medısınalyq saqtandyrý qory tegin medısınalyq kómektiń kepildendirilgen kóleminiń operatory jáne medısınalyq qyzmetter úshin biryńǵaı aqy tóleýshi bolyp esepteledi. 2020 jylǵa deıin medısınalyq qyzmetterdi josparlaý, satyp alý, sapasyn baqylaý jáne aqy tóleý tetikterin jasaý, sondaı-aq tólemdik aqparattyq júıe jumysyn jolǵa qoıý, jańa tarıftik saıasatty engizý tetikteri júıelenetin bolady. Atalǵan sharalar MÁMS sharttary boıynsha Qordyń 2020 jyldyń 1 qańtarynan bastap jumys isteýge tolyq daıyn bolýyn qamtamasyz etedi.