Qazaqstan Respýblıkasy (QR) Energetıka mınıstri (EM) Qanat Bozymbaev bastaǵan Qazaqstan delegasıasy Abý-Dabıde (Birikken Arab Ámirlikteri) 13-14 qańtarda ótetin Jańartylatyn energıa kózderi jónindegi halyqaralyq agenttik (IRENA - International Renewable Energy Agency) Assambleıasynyń VIII sesıasynyń jumysyna qatysady dep habarlaıdy Qamshy.kz aqparat agenttigi. 

Qanat Bozymbaev IRENA Assambleıasynyń VIII sesıasynyń plenarlyq otyrysynda sóz sóıleıdi dep kútilýde.

Sonymen qatar, Assambleıa sesıasynyń alańynda OQO Arys qalasyndaǵy kún elektr stansıasynyń (14 MVt) qurylysy boıynsha «Zadará» jobasyn qoldaý boıynsha QR EM, Eýropalyq qaıta qurý jáne damý banki jáne «URBASOLAR» arasynda kelisimge qol qoıylady dep kútilýde.

Assambleıa sesıasynyń jumysy aıasynda mınıstrliktiń birneshe taqyryp boıynsha dóńgelek ústelderi uıymdastyrylady: «Energıa transformasıasynyń jahandyq údetkishi: jańartylatyn energıa kózderine aýqymdy ınvestısıalar», «Energıany jańartýǵa arnalǵan ınovasıalar: elektrondy mobıldilik».

Sondaı-aq, Q.Bozymbaevtyń IRENA Bas dırektory Adnan Ze Amın myrzamen, Birikken Arab Ámirlikteriniń Energetıka jáne ónerkásip mınıstri S. Al-Mazrýı myrzamen jáne «Mubadala Investment Company» memlekettik ınvestısıalyq kompanıasynyń munaı-gaz jáne munaıhımıalyq jobalary jónindegi bas atqarýshy dırektory, «Borealis AG» kompanıasynyń qadaǵalaý keńesiniń múshesi Mýsabbeh ál-Kaabı myrzamen jeke kezdesýleri kútilýde.

IRENA Assambleıasynyń 8-shi sesıasynyń jumysy aıasynda ADFD/IRENA jobalaryn qarjylandyrýdyń VI sıklyna qatysý múmkindigi qarastyrylýda.

Qazaqstan delegasıasy sonymen qatar 15 qańtarda Abý-Dabıde ótetin «Bolashaqtyń energıasy» atty XI Dúnıejúzilik samıtiniń ashylý saltanatyna jáne «Zayed Future Energy Prize» halyqaralyq syılyǵynyń tapsyrý saltanatyna da qatysýǵa nıetti, sondaı-aq osynyń aıasynda halyqaralyq kórmege jáne qazaqstandyq pavılonnyń jumysymen tanysady.