Astananyń tabıǵı resýrstar jáne tabıǵatty paıdalanýdy retteý basqarmasy «Rýhanı jańǵyrý» baǵdarlamasynyń «Sanaly Azamat» jobasy aıasynda 2018 jyldyń sońyna deıin «Jańa týǵan ár nárestege bir aǵashtan» atty ekologıalyq aksıany ótkizedi dep habarlaıdy Qamshy.kz aqparat agenttigi elorda ákimdiginiń resmı saıtyna silteme jasap. 

2018 jyldyń alǵashqy kúnderinen bastap elordanyń densaýlyq saqtaý nysandarynyń perzenthana bólimderi dúnıe esigin ashqan nárestelerge ishinde otyrǵyzylǵan aǵashtardyń syzbasy men quttyqtaý býkletteri bar konvertterdi tabystaýda. Astananyń tabıǵı resýrstar jáne tabıǵatty paıdalanýdy retteý men densaýlyq saqtaý basqarmalary birlesip júzege asyryp jatqan «Jańa týǵan ár nárestege bir aǵashtan» aksıasy qoǵamdy qorshaǵan ortany qorǵaýǵa, tarıhı dástúrdi saqtaýǵa shaqyrýdy, ekologıalyq bilimdi is júzinde nasıhattaýdy, óskeleń urpaqtyń qorshaǵan ortaǵa, salaýatty ómir saltyna degen súıispenshilik sezimin oıatýdy, qoǵamnyń ekologıalyq mádenıetin arttyrýdy, jastardy el ıgiligi úshin ıgi ister jasaýǵa shaqyrýdy kózdeıdi.

Ekologıalyq aksıany uıymdastyrýshylardyń aqparatyna qaraǵanda, elordada týǵan nárestelerdiń qurmetine otyrǵyzylǵan kóshetter «Astana qalasynyń jasyl beldeýiniń» aýmaǵynda ornalassa kerek. 

«Ekologıalyq naýqanǵa daıyndyq 2017 jyly bastaldy. Onyń aıasynda quttyqtaý hattaryn, nómirleri bar aǵashtardyń ornalasý sqemalaryn ázirleý, «Astana qalasynyń jasyl beldeýiniń» aýmaǵynda 4-5 jyl buryn otyrǵyzylǵan bıiktigi bir metrge jýyq kóshetter bar ýchaskelerdi anyqtaý sıaqty qyrýar jumys atqaryldy. 

1 aqpandaǵy jaǵdaıǵa sáıkes jasyl beldeýdiń oryndaý syzbasy boıynsha «Qarqaraly» tas joly jaǵynan ornalasqan «qarapaıym shegirshin» kóshetteri bar birinshiden jetinshige deıingi yqtyrmalar anyqtaldy. Ekologıalyq aksıaǵa barlyǵy 35 yqtyrma bólindi», - dep málimdedi Astananyń tabıǵı resýrstar jáne tabıǵatty paıdalanýdy retteý basqarmasynda. 

Aıta keteıik, «Jańa týǵan ár nárestege bir aǵashtan» aksıasynyń basynan Astana qalasynyń №1, №2, №3 Perınataldy ortalyqtarynda dúnıege kelgen sábılerdiń ata-analaryna 1704 quttyqtaý haty tapsyryldy.