Sońǵy ýaqytta ózge ult ókilimen birge júrgen qazaq qyzdaryna tıisip, vıdeoǵa túsirip, áleýmettik jelige jarıalaý jıi oryn alýda dep jazady Qamshy.kz aqparat agenttigi. Sheteldik jigitke turmysqa shyqqan boıjetkenderdi synǵa alyp, aıyptaǵandardyń biri Jánibek Imanmázirge jýrnalıs ári bloger Araılym Álimhan hat jazdy.
«Qurmetti Jánibek myrza, sizdiń ult úshin, "qazaq xalqy" dep ár jerden patrıottyq sezimińizdi bildirip júrgenińiz quptarlyq is eken. Alaıda, sonaý úlken basyńyzben ár qazaqtyń qyzyn sheteldikke bermeımin, ózge ult ókilin tańdaǵan ár qazaq qyzy arsyz degen sózderińizge kelispeımin. Shet eldik jigittiń sońynan ergen qazaq qyzdarynyń biri men bolamyn jáne ózimniń bolashaq jarymdy maqtan tutamyn. Sizdiń jasyńyzda jaman ult bolmaıtynyn, jaman adam bolatynyn túsinetin ýaqyt keldi emes pe?
Jaraıdy, muny túsinbeıdi delik. Al endi Zań aldyńda bul da úlken qatelik ekenin bilmep pe edińiz? Biz kópultty ári kóp dindi beıbit jáne zaıyrly memlekette turamyz. Sizdiń myna qylyqtaryńyz ultaralyq arazdastyqqa jatady jáne ashýy kelgen adam sizdiń ústińizden aryz jazsa erteń bir emes birneshe bappen sottalyp ketýińiz múmkin.
Já, buǵan da qosh delik. Kúıeýge tıe almaı júrgen barlyq qyz-kelinshekti jınap alyp qaıtpeksiz? Bizde Zań boıynsha Toqal alýǵa bolmaıdy, ıaǵnı kópáıelalý degenimiz kóńildestiń sanyn arttyrý. Eger sonshalyqty "namysshyl batyr" bolsańyz, qazaqtyń qanyn qurttyńdar degen janaıqaıyńyzdy esitisin deseńiz, basqa ultqa úılenetin jigitterden bastańyz. Nege jat jurttyq qyzǵa tıisesiz de, basqa erkekke sóz aıta almaısyz?
Jesir, ajyrasqan ne balaly kelinshekter sheteldikke tıse onyń nesi aıyp? Bireýdiń jeke ómirine qol suǵyp, keıbir vıdeoda bet jyrtysýdasyz? Bul bizdiń Ata Zańymyzǵa qaıshy emes pe?
Keremet qazaq jigiti, namysshyl bolsańyz úlgili azamat retinde ózińizdi kórsetpeısiz be? Diken-diken etip, beıtanys qyzdy qolyńyzben túrtkenińiz ne sumdyq? Musylman bolsańyz aýyzyńyzdy nege baǵyp sóılemeske?
Men aýyzynan shólmegin túsirmeıtin, qatyn men bala-shaǵasyn uratyn, qazaqtyń jap-jas qyzdaryn qorlap zorlaıtyn ımansyz keıbir qazaqtyń jigitin emes, júreginde ımany bar sheteldik jigitti tańdadym. Barlyq qazaq jaman demeımin. Sol az ǵana qazaqty birine-birin qarsy qoıyp otyrǵan sizdi jaman deımin.
Sizdeı zań men tarıxtan esh xabary joq adamdar elimdi artqa tartyp, memleketimizdiń ósýine óziniń keri áserin tıgizeri sózsiz. Toqeterim, eshqandaı xalyq "taza" bir ulttan turmaıdy, qan árdaıym almasyp otyrǵan”, – dep sózin aıaqtady Araılym Álimhan.
