Búgin startap-jobalardy ınkýbasıalaýǵa arnalǵan «Garage» tegin baǵdarlamasy iske qosyldy. Osy baǵdarlama kómegimen sarapshylar isin jańadan bastap jatqan kásipkerlerge turaqty bıznes-modelderdi quryp, olardy damytýǵa kómektesetin bolady. 3 aıǵa sozylatyn bul joba qatysýshylardy 2018 jyldyń qyrkúıeginde bastalatyn akselerasıalyq baǵarlamanyń kelesi kezeńine daıyndamaq. Baıqaýǵa qatysý úshin 150-den asa ótinim kelip túsip, olardyń ishinen eń úzdik jobalar iriktelip alyndy.
İs-sharanyń ashylýyna QR aqparat jáne komýnıkasıa mınıstri Dáýren Abaev qatysty. Ol Astana Hub halyqaralyq IT-startaptar tehnoparkin qurý ıdeıasy «Sıfrlik Qazaqstan» memlekettik baǵdarlamasy aıasynda qamtylǵanyn, sondaı-aq, joba tujyrymdamasy halyqaralyq tájirıbeni zertteý negizinde daıyndalǵanyn atap ótti.
Astana Hub halyqaralyq IT-startaptar tehnoparkiniń basshysy Maǵjan Mádıev «Garage» jáne «C-Lab» startap-baǵdarlamalarynyń qazirgi nátıjelerimen bólisti. «Atalǵan baǵdarlamalar aıasynda biz ıdeıa jáne prototıp kezeńinde turǵan startap-komandalarmen jumys júrgizemiz. «Garage» preakselerasıalyq baǵdarlamasyna bizge 151 ótinim kelip tústi, olardyń ishindegi 43 joba Demo Day-ge ótkizildi. Eń basty talap jobanyń aýqymyn keńeıtýge bolatyndyǵymen baılanysty. «C-lab» baǵdarlamasyna 100-den asa ótinim jiberildi. Búgin qatysýshylar alǵash ret korporasıalarmen kezdesip otyr, ary qaraı komandalarmen etene jumys júrgizilip, aqparattyq sesıalar, jeke keńes berýler ótkiziledi, ıdeıany damytyp, onyń prototıpin jasaıtyn bolamyz. Jazda jobalardy testilep, kompanıalardyń bazasynda iske qosqaly otyrmyz», - dep atap ótti Mádıev myrza.
«Garage» baǵdarlamasy aıasynda komandalar óz startabynyń ıdeıasyn testilep, eń kem degende jumysqa jaraıtyn ónimdi (MVP) jasap shyǵarýǵa, alǵashqy klıentterdi tartyp, óz jobalaryn ınvestorlarǵa tanystyrýǵa múmkindik almaq. Inkýbatordyń ereksheligi – ony kásipkerlerdiń ózi basqa kásipkerlerge arnap quryp otyrǵandyǵynda.
Baǵdarlama Stıv Blanktyń «lean startup» - únemshil startap dep atalatyn ádisnamasyna negizdelgen. Qatysýshylar komandalarǵa bólinip, olardyń árqaısysy óz ıdeıasyn tanystyrady. Tálimgerler retinde qatysatyn bıznesmender óz qol astyna alatyn komandany tańdap alady. Eger birneshe tálimger bir komandany tańdaıtyn bolsa, sheshimdi komandyń ózi jasamaq.
Búgin árbir komanda óz bıznes-jobasyn tanystyrady, al keshke olardyń ishindegi úzdikteri «Garage» startap-ınkýbatoryna qatysý úshin tańdap alynady. Osylaısha isin jańadan bastaǵan kásipkerler tájirıbeli tálimgerlerdiń qol astynda jobany basqarý, ónim jasaý jáne marketıń jóninde tegin bilimdergi ıgerýge múmkindik alady.
Sondaı-aq, qatysýshylar joba aıasynda baǵdarlama jasaýshylar, dızaınerler, marketologtar syndy mamandardyń qyzmetterine qol jetkizedi, sondaı-aq, olar shapshań ınternet, jarnama jasaý úshin seriktesterdiń bergen kýpondary (Google Adwords, Facebook ads), bulttyq servıster (Amazon web services, Microsoft, Adobe) syndy barlyq qajetti quraldarmen qamtamasyz etilgen EXPO aýmaǵyndaǵy keńseni paıdalana alady.
Startap-jobalardy tanystyrýmen qatar, ashylý saltanaty aıasynda jastar arasynda kásipkerlik mádenıetti damytý jáne otandyq bıznesti halyqaralyq naryqqa shyǵarý taqyrybyna arnalǵan eki paneldik sesıa ótti.
Sesıalar kezinde spıkerler retinde kelesi tulǵalar sóz sóıledi:
- Saıasat Nurbek – táýelsiz sarapshy
- Eldar Jumaǵazıev – “Atameken” UKP basqarma tóraǵasynyń orynbasary
- Qanat Qojahmet – S. Demırel atyndaǵy ýnıversıtet rektory
- Qanat Baıǵarın – Nazarbayev University vıse-prezıdenti
- Almas Kebekbaev - top.kz negizin qalaýshy jáne SEO-sy
- Aleksandr Doroshenko - Wooppay negizin qalaýshy jáne SEO-sy.
Unilever zertteýine sáıkes 2025 jylǵa qaraı korporasıalar men startaptar qoıan-qoltyn jumys júrgizbek. Sondyqtan «Garage» jobasyna qosa, «C-lab zerthanasy» dep atalatyn taǵy bir startap-joba iske qosyldy. Bul zerthanada startaptar korporasıalarmen etene jumys jasap, naqty mindetterdi sheshýge jáne uzaq merzim boıy jumys júrgizýge múmkindik alady. Astana Hub jobany MOST bıznes-ınkýbatorymen birlese júzege asyryp jatyr.
MOST bıznes-ınkýbatorynyń bas dırektory Alım Hamıtov joba jóninde bylaı dep atap ótti: «Búgingi kúni «Sentras» kompanıalar toby, «Sberbank» AQ, UNICEF Kazakhstan, «Qazposhta» AQ, «Astana Innovations» AQ syndy kompanıalar bizdiń seriktesterimiz bolyp tabylady. Atalǵan kompanıalar jobaǵa qyzyǵýshylyqtaryn bildirip, startaptar aldyna mindetter qoıyp, olarmen birlese ónimderdi damytýǵa daıyn. Baǵdarlama aıasynda sheshimderdiń prototıpi jasalady. 10-ǵa tarta «pılottyq joba», sondaı-aq, korporasıalar men startaptardyń 2-3 komersıalyq ónimi iske qosylady dep kútip otyrmyz».
«C-lab zerthanasy» - korporatıvtik sektor men startaptar arasyn jalǵaıtyn alań. Baǵdarlamanyń maqsaty – jańa ıdeıalar men servısterdi izdeý jáne korporatıvtik sektordyń startaptarmen baılanysyn damytý. 5 aqpan kúni Astana Hub bazasynda osy baǵdarlamaǵa qatysatyn jobalar iriktelip alyndy. Aldaǵy úsh aıda «C-lab» zerthanasy kompanıalarmen birlese otyryp, komandalarǵa ıdeıalardy jasap shyǵarýǵa kómektesip, aqparattyq sesıalardy ótkizip, komandalarǵa jeke keńes berýmen aınalysyp, prototıpterdi jasap shyǵarady. Eń úzdik jobalar testileý satysyna ótkizilip, júzege asyrý jóninde shart jasasýǵa múmkindik almaq.
