Osydan eki kún buryn Qazaqstan halqy Assambleıasy tóraǵasynyń orynbasary qyzmetinde júrgen Darhan Myńbaı Parlament Májilisi depýtaty kýáligin alyp, búgin Májilistiń Ekologıa máseleleri komıtetiniń múshesi bolyp qyzmetine kirisip ketti, dep jazady Qamshy.kz aqparat agenttigi kazpolit.kz saıtyna silteme jasaı otyryp.
Bizdiń aıtpaǵymyz Darhan Myńbaıdyń mandaty emes, onyń týra 11 aı basqarǵan Assambleıadaǵy ıesiz qalǵan qyzmeti bolmaq. Ádette Elbasy Assambleıadaǵy orynbasaryn taǵaıyndaǵanda uzaqqa sozbaıtyn. Bul joly bári basqasha órbip jatyr, demek úlken aýys-túıistiń bastaýy Assambleıa bolýy múmkin. «KazPolit.kz» osy bir ózgeristerdiń aldynda «jaýyryn qarap», saıası boljam jasap kórmek. Endeshe kandıdattardy usynyp kóreıik.
«Máńgi kandıdat» – Qyrymbek Kósherbaev
Assambleıaǵa ádette Prezıdent Ákimshiliginiń mektebinen ótken, ıdeologıany biletin, dıplomatıada tájirıbesi bar salmaqty adamdy qoıady. Qyrymbek Kósherbaevta munyń bári bar. Qyrymbek Eleýuly 1996-1997 jyldary Prezıdenttiń Baspasóz qyzmetin basqardy. Osy mektepten ótkennen keıin ǵana ol naqty bir salany derbes basqarýǵa kóshti. 1997-1999 jyldary – Bilim, mádenıet jáne densaýlyq saqtaý mınıstri boldy. Sosyn Densaýlyq saqtaý, bilim berý jáne sport mınıstri, 1999-2000 jyldary – Bilim jáne ǵylym mınıstri boldy. Sosyn birneshe oblysta ákim boldy. Qysqasy, saıası basqarý qyzmeti jańa ǵasyrmen birge bastaldy.
2003-2006 jyldary Qazaqstan Respýblıkasynyń Reseı Federasıasyndaǵy elshisi qyzmetin atqardy. Bul búginde álemdik saıasatqa yqpal etip otyrǵan Vladımır Pýtınniń endi ǵana qyzmetke kirisken kezeńi bolatyn. Sol tusta eki el arasyndaǵy shekaralyq máseler osy kezeńde túpkilikti sheshildi.
Jaqynda ótken Úkimettiń keńeıtilgen otyrysynda memleket basshysy Qyzylorda oblysynyń ákimin synap ta, jigerlendirip te aldy. Baıandamasyn oryssha bastaǵan ákimge «Sen qazaqy oblystan kelgen joqsyń ba?!» dep bir tıisse, artynan eki alyp megapolısti basqaryp otyrǵan Baýyrjan Baıbek (Almaty) pen Áset Isekeshevke (Astana) «Baıandama jasaýda Qyrymbekke jete almaısyńdar, ol óte tájirıbeli basshy» dep kóptiń aldynda jelpindirip qoıdy. Rasymen, Q.Kósherbaevtyń baıandamasy árqashan jınaqy, áýezdi, tolymdy shyǵady. Assambleıaǵa búginde dál osyndaı adam kerek, ıaǵnı eldi sózine uıyta alatyn, qoǵamda salmaǵy bar, aýzy «dýaly» salmaqty tulǵa qajet.
Búgin Qyrymbek Eleýuly Qyzylorda halqyna esep berip, tek ótken jylǵa ǵana emes, oblysty ózi basqarǵan tutas bes jyldy qorytyndylady. Bul bir jaǵynan 5 jyldy qorytyndylaý bolsa, ekinshi jaǵynan oblys halqymen jyly qoshtasqany da bolýy múmkin.
«Naǵyz ıdeologıanyń adamy» – Túımebaev
Túımebaevtyń mamandyǵy – fılolog. Ol – fılologıa ǵylymdarynyń kandıdaty, profesor. «Qazaq tiliniń tarıhı gramatıkasy», «Qazirgi qazaq tiliniń leksıkologıasy», «Qazaq tili», «Qazaq tili: Gramatıkalyq anyqtamalyq», t.b. kitaptardyń avtory. Búginde osy kitaptardyń avtory elimizdegi eń alyp oblys OQO-ny basqaryp otyr.
QR Prezıdenti protokolynyń bastyǵy, QR Prezıdentiniń keńesshisi bolǵan. QR Bilim jáne ǵylym mınıstri bolyp qyzmet atqardy. Dıplomatıadaǵy tájirıbesi orasan. Qazaqstan úshin eń mańyzdy strategıalyq mańyzy bar Reseı Federasıasy jáne Túrkıadaǵy (tipti Albanıalaǵy elshilikti qosa atqardy) QR tótenshe jáne ókiletti elshisi boldy.
J.Túımebaevtyń OQO ákimi bolǵanyna bir jyldan asypty (1 jyl, tórt aı). Alaıda, OQO jurtshylyǵy Túımebaevtyń iskerlikten góri rýhanıatqa jaqyn, menedjerlikten góri ıdeologıaǵa qabiletti basshy dep sanaıdy. Byltyr Túrkistan qalasynda toılanǵan Naýryz merekesinen keıin belgili bloger Aıgúl Orynbek osy pikirge jaqyn sózdi aıtqan bolatyn. «Oblys ákimi Túımebaevtyń naǵyz ıdeologıanyń, rýhanıattyń adamy ekenin kórdik, bildik. Endeshe, mundaı tulǵany nege Mádenıet mınıstri etip taǵaıyndamasqa? Árkim óz isimen aınalysýy kerek qoı?! Túımebaev mınıstr bolsa rýhymyzdy kóteretin talaı sharalardy ótkizer edi, sapaly fılmder túsirer edi, elimizde mádenıet salasyn qaıta jandandyrar edi», — deıdi Aıgúl Orynbek.
Sondyqtan, J.Túımebaevty Assambleıaǵa orynbasar etip taǵaıyndap jatsa tańǵalýdyń qajeti joq.
Berdibek Saparbaev hám Danıal Ahmetov
Berdibek Saparbaev pen Danıal Ahmetov týraly boljamymyzdy osyǵan deıin aıtqan bolatynbyz. Ekeýi de zeınet jasyna shyqqan, bıliktiń barlyq baspaldaqtarynan ótken tájirıbeli saıasatkerler. B.Saparbaev tórt birdeı oblystyń ákimi bolǵan tájirıbeli saıasatker bolsa, D.Ahmetov tórt ret ákim bolǵan, tipti Úkimet basqarǵan kánigi tulǵa. Assambleıanyń qoǵamdaǵy rólin kúsheıtý úshin osyndaı salmaqty basshylardy da ákelýi múmkin.
Aıtpaqshy, «Nur Otan» partıasynyń kezekten tys XVII sezinde Májilis depýtattyǵyna úmitkerlerdiń partıalyq tizimi jasalǵanda qazirgi oblys ákimderiniń arasynan Berdibek Saparbaev, Amandyq Batalov jáne Danıal Ahmetovter engen edi. Qazir Májiliste bir mandattyń bos turǵany jaıly áńgime bar. Kim bilsin….
Memlekettik hatshy – Gúlshara Ábdiqalyqova
Gúlshara Naýshaqyzynyń QR Memlekettik hatshysy bolyp otyrǵanyna 3 jyldan asypty. Oǵan deıin ár jyldary Ahmetjan Esimov, Ábish Kekilbaev, Qasym-Jomart Toqaev, Imanǵalı Tasmaǵambetov, Oralbaı Ábdikárimov, Qanat Saýdabaev, Muhtar Qul-Muhamed, Marat Tájın, Ádilbek Jaqsybekov sekildi «narqasqalar» basqarǵan qyzmetke táýekel etip QR Eńbek jáne halyqty áleýmettik qorǵaý mınıstri, QR Premer-Mınıstriniń orynbasary bolǵan Gúlshara Ábdiqalyqovany qoıǵan bolatyn. Gúlshara Naýshaqyzy úsh jyl ishinde memlekettiń ishki jáne syrtqy saıasattyń negizgi baǵyttary boıynsha emes, ıdeologıalyq jumystarǵa belsendi aralasty deýge bolady. Sondyqtan Qazaqstan halqy Assambleıasy Tóraǵasynyń orynbasary qyzmetine kandıdat retinde Gúlsharany da qarastyrýǵa bolady.
