Pavlodarda orys qolbasshysy Mıhaıl Kýtýzov atyndaǵy kóshege Qazaqstan prezıdenti Nursultan Nazarbaev esimin berýdi usyndy. Oblys ákimdigi baspasóz qyzmetiniń habarlaýynsha, usynysty 16 aqpan kúni Pavlodar oblysynyń ákimi Bolat Baqaýovtyń turǵyndarǵa esep berý jıynynda qoǵamdyq keńes tóraǵasy, Pavlodardyń burynǵy ákimi Aleksandr Rúmkın bildirdi. Jergilikti aqparattyq saıttardyń habarlaýynsha, kezdesý Estaı atyndaǵy qalalyq mádenıt úıinde ótken, dep jazady Qamshy.kz aqparat agenttigi. 

- Sońǵy ýaqytta qalamyzdyń kórkin kirgizý úshin kóp nárse isteldi, ásirese Kýtýzov kóshesi ózgertildi. Qalany kórkeıtýge kóńil bólip jatqanyńyz úshin kóp rahmet. Almatyda Fýrmanov atyndaǵy kósheniń atyn ózgertti. Shymkentte de mundaı másele kóterildi. Pavlodarda da kórikti kóshelerdiń birine Qazaqstan prezıdentiniń esimi berilýi tıis dep oılaımyn, - dedi Aleksandr Rúmkın. Oblys ákimi bul usynysqa oılanatynyn aıtqan.

Qazaqstanda kóshe jáne nysanǵa Nursultan Nazarbaevtyń esimi buǵan deıin de berilgen.

Byltyr Pavlodarda jergilikti turǵyndar ákimge Lenın kóshesin Astana dep ózgertýdi usynǵan. Keıbir turǵyndar qalanyń ortalyǵyndaǵy úlken kóshelerdiń biri Kýtýzov kóshesin Astana dep ataýdy usynǵan. Biraq qalalyq máslıhat aqyrynda Lenın kóshesin Astana dep ataýdy qoldaǵan.

Birer kún buryn Oralda jańa salynǵan alańǵa Nazarbaevtyń atyn berý usynysy aıtylǵany habarlanǵan.

Ótken aıda Ońtústik Qazaqstan oblysy máslıhatynyń depýtattary Shymkenttegi Astana alańynyń atyn prezıdent Nursultan Nazarbaev atyndaǵy alań dep ózgertý týraly usynysty qoldaǵany habarlanǵan.

Byltyr qarashanyń sońynda Almatynyń ortalyǵyndaǵy sovet kezeńinen beri ózgertilmegen Fýrmanov kóshesi Nazarbaev dańǵyly dep ózgertilgen. Nursultan Nazarbaev Tuńǵysh prezıdent kúni qarsańynda qabyldanǵan bul sheshimdi «kóptegen turǵynnan túsken usynys» dep túsindirgen.