Almaty oblysynda mal sharýashylyǵy turaqty damyp, 2017 jyly «Sybaǵa» memlekettik baǵdarlamasy 147%, «Altyn asyq» - 159, «Qulan» - 127% oryndaldy. Osynyń barlyǵy mal basynyń orta eseppen 3,5%-ǵa  ósýine múmkindik berip, aýyl azamattarynyń jyl boıy jumyspen qamtylýyna yqpal etti. Bul týraly oblys ákimi A. Batalov turǵyndar aldyndaǵy esep berý jıynyndaǵy baıandamasynda aıtty, - dep habarlaıdy Qamshy.kz aqparat agenttigi Almaty oblysy ákiminiń baspasóz qyzmetine silteme jasap.

Oblys basshysynyń aıtýynsha, búginde óńirde 51 myń bas iri qaraǵa arnalǵan 78 mal bordaqylaý alańy jumys isteıdi. Endigi basty mindet – et eksportynyń josparyn oryndaý.

«Bıylǵy jyly ırandyq «Imperıa Fýd» kompanıasynyń et óńdeıtin keshenin iske qosý arqyly bul mindetti oryndaıtyn bolamyz. Keshen jobalyq qýatyna saı jylyna 8 myń tonna daıyn ónim shyǵara alady. Bıylǵy jyldyń ózinde shet elderge 700 tonnaǵa deıin et eksporttaýdy josparlap otyrmyz», - dedi A. Batalov.