Taldyqorǵan medısınalyq kolejinde qoǵamdyq densaýlyq saqtaý salasynyń mamandaryn daıyndaýdaǵy ózekti máseleler men keleshek damýy talqyǵa tústi, dep jazady Qamshy.kz aqparat agenttigi.

Bul sharaǵa medısınalyq JOO-lardyń jetekshi ǵalymdary men oqytýshylary, dárigerler, qoǵamdyq densaýlyq saqtaý departamenti men Óńirlik kásipkerler palatasynyń mamandary qatysyp, usynys-pikirlerin ortaǵa saldy.

Kolej ókilderiniń aıtýynsha, «Gıgıena jáne epıdemıologıa» mamandyǵy boıynsha bilim berý baǵdarlamasy eskirgen jáne jumys berýshilerdiń talaptaryna sáıkes kelmeıdi eken.

«Densaýlyq saqtaý júıesinde profılaktıkalyq medısınanyń ustanymyn tájirıbede iske asyratyn qoǵamdyq densaýlyqty qorǵaý salasynyń orny erekshe. «Gıgıena jáne epıdemıologıa» mamandyǵy boıynsha bekitilgen memlekettik jalpyǵa mindetti bilim berý standarty zaman talaby men onyń sharttaryna jaýap bermeıdi. Praktıkada jumys berýshiler túlekterden múldem basqa mindetter talap etedi», - dep aıtyp ótti Taldyqorǵan medısınalyq kolejiniń dırektory Serik Janseńgirov.

S.Asfendıarov atyndaǵy Qazaq UMÝ profesory Sáken Ámireevtiń aıtýynsha, maman daıyndaý máselesin respýblıkalyq deńgeıge kóterip, bilim berý standarttaryna qajetti ózgertýler engizý kerek.

«Barlyq salalar men baǵyttar boıynsha damý men jańǵyrtý júrip jatyr. Biz bir orynda qalyp qalǵan sıaqtymyz. Mamandyq boıynsha stýdentter testileýdi óte almaıdy. Sebebi, baǵdarlamada kóptegen taqyryptar qamtylmaǵan. Mysaly, shet elderde osy mamandyq bar bolǵanymen basqasha atalady. Búgingi kóterip otyrǵan suraqty keń kólemde talqylap, ıaǵnı joǵary oqý ornymen birigip ortaq mámilege kelý kerek», - deıdi Sáken Ámireev.

Osyǵan baılanysty «Gıgıena jáne epıdemıologıa» mamandyǵy boıynsha túlekter arasynda jumysqa ornalasý deńgeıi tómen. Sonymen birge, atalmysh sharada sarapshylar qorytyndy attestasıalaýdy eki kezeń boıynsha ótkizýdi jáne elektıvti pánderdiń katalogin engiýdi usyndy.

Óz kezeginde, Almaty oblysy Kásipkerler palatasynyń sarapshysy Ardaq Qashqarova dýaldi oqytýdy engizý máseleni sheshýdiń bir sebebi bolyp tabylatyn aıtyp ótti.

«Dýaldi júıe oqytý úrdisinde teorıalyq jáne praktıkalyq daıyndyqty biriktire alady. Oqý baǵdarlamasy jumys berýshiniń tapsyrysymen jáne tikeleı qatysýymen ázirlenip, bir mamandyq boıynsha oqý materıaldarynyń kólemin pán boıynsha bólýge múmkindik beredi. Osylaısha, Dýaldi oqytý júıesin damytýdyń jol kartasy aıasynda oqý baǵdarlamasyna ózgertý engize alasyzdar», - dedi Ardaq Qashqarova.

Sarapshy atalmysh másele boıynsha óńirlerdiń pikirin eskerý mańyzdylyǵyn atap ótti.

Talqylaý qorytyndysy boıynsha, medısınalyq kolej aldaǵy ýaqytta Almaty oblysynyń Dýaldi oqytýdy damytýdyń jol kartasyna ený men memlekettik jalpyǵa mindetti bilim berý standartyna birqatar ózgertýler engizýdi josparlap otyr.

Eske salsaq, Taldyqorǵan medısınalyq kolejiniń 80 jyldyq tarıhy bar. Búgingi tańda oqý orny segiz mamandyq boıynsha kadr daıyndaıdy.