Oral qalasynda alǵash ret qusbegilerdiń «Qansonar – 2018» respýblıkalyq týrnıri ótti. Shara «Rýhanı jańǵyrý» baǵdarlamasy aıasynda uıymdastyryldy, dep jazady Qamshy.kz aqparat agenttigi.
– Qadirmendi oraldyqtar, qala qonaqtary, ulttyq sport janashyrlary, babalarymyzdan asyl mura bolyp jetken qusbegilik ónerdiń Aq Jaıyq óńirinde alǵash ret ótkeli turǵan saıysy qutty bolsyn! Jahandaný dáýirinde salt-dástúrimiz ben ulttyq kodymyzdyń saqtalyp qalýyna áserin tıgizetin ulttyq naqyshtaǵy sport túrlerin jańǵyrtý – Elbasymyzdyń «Bolashaqqa baǵdar: rýhanı jańǵyrý» atty maqalasynda aıtylǵan negizgi baǵyttardyń biri. Sondyqtan sporttyń bul túrin óńirimizde júıeli túrde damytýǵa bel býyp otyrmyz. Halqymyz árqashan aýyzbirlikte bolyp, ulttyq dástúrimiz jańǵyra bersin, aǵaıyn! – dedi týrnırdiń ashylý saltanatyna qatysqan oblys ákiminiń orynbasary Ǵabıdolla Ospanqulov.
Ortaǵasyrlyq Jaıyq qalashyǵy mańynda senbi kúni bastalyp, eki kúnge sozylǵan sharany tamashalaýshylardyń qarasy mol boldy. Olardyń qatarynda jergilikti jurtshylyqtan bólek Reseıdiń kórshiles oblystarynan kelgen týrıser de bar.
— Dál osyndaı týrnır osyǵan deıin Mańǵystaý, Atyraý oblystarynda ótken bolatyn. Endi búgin Batys Qazaqstanda uıymdastyrylýyn osy óńirde qusbegilik ónerdi damytýdyń bastamasy dep bilemiz. Búgingi týrnırdi joǵary deńgeıde uıymdastyryp otyrǵan Batys Qazaqstan oblysynyń ákimdigine Qazaqstan Respýblıkasynyń ulttyq sport túrleri qaýymdastyǵynyń atynan alǵysymdy bildiremin, — dedi QR ulttyq sport túrleri qaýymdastyǵynyń vıse-prezıdenti Erlen Ospanov.
Týrnırde Astana, Almaty qalalarynyń, sondaı-aq Aqmola, Aqtóbe, Atyraý, Qaraǵandy, Qyzylorda, Mańǵystaý jáne Batys Qazaqstan oblysynyń qusbegileri óner kórsetti.
Týrnırdiń alǵashqy kúninde barlyǵy 16 qyran synǵa tústi. Eki kún boıy baq synasqan búrkitshiler arasynda bas júldeni alǵan atyraýlyq búrkitshi Arman Qoshqarov aldy. Jambyl oblysynan kelgen Baqdáýlet Bababajanov ekinshi orynnan kórinse, Aqmola oblysynan kelgen Bergenbaı Tastanbek jáne astanalyq Serikbek Kúntýǵan úshinshi oryndy teń bólisti.
