Qazaqstan Respýblıkasynyń Din isteri jáne azamattyq qoǵam vıse-mınıstri Berik Aryn Aqtóbe oblysynyń turǵyndarymen bolǵan kezdesýde Memleket basshysy N.Á.Nazarbaevtyń «Tórtinshi ónerkásiptik revolúsıa jaǵdaıyndaǵy damýdyń jańa múmkindikteri» atty Joldaýynyń basym baǵyttaryn túsindirdi, dep habarlaıdy Qamshy.kz aqparat agenttigi

Vıse-mınıstr Aqtóbe oblysynyń Muǵaljar jáne Alǵa aýdanynyń turǵyndarymen ótken kezdesýde Din isteri jáne azamattyq qoǵam mınıstrliginiń qyzmetine sáıkes keletin Joldaýdyń  basym baǵyty - adamı kapıtaldy damytý ekendigine toqtalyp ótti.

«Adamı kapıtaldy damytý aıasynda turǵyndardyń densaýlyǵyn nyǵaıtý, medısınalyq kómektiń sapasy men qol jetimdiligin jaqsartý qajettiligi mańyzdy ekeni aıtyldy. Bizdiń qoǵam úshin Joldaýdyń sapaly jumyspen qamtý jáne áleýmettik qamtamasyz etý júıesin damytý boıynsha bólimi ózekti bolyp tabylady. Munda barlyq negizgi mamandyqtar boıynsha zamanaýı standarttardy ázirleý mańyzdy»- dep atap ótti Berik Aryn.

Adamı kapıtaldyń alǵa jyljýyna, árıne eldegi turaqtylyq pen beıbitshiliktiń úles qosatyny sózsiz. Osy turǵyda Berik Aryn  bıylǵy Joldaýda Memleket basshysy elimizdiń áleýmettik-ekonomıkalyq jetistikteriniń irgesinde konfesıaaralyq jáne etnosaralyq kelisim jatyr - dep atap ótkenin turǵyndarǵa jetkizdi. Sondaı-aq mınıstrliktiń atqaryp otyrǵan qyzmetine toqtalyp, din salasynda ázirlenip jatqan jańa zań jobasy qoǵam arasynda barynsha túsindirilip jatqandyǵy týraly baıandady.

«Bul joba kóptegen túrli dıalogtik alańdarda sarapshylardyń, dinı birlestikter men memlekettik organdardyń ókilderiniń, teologtardyń, buqaralyq aqparat quraldar men úkimettik emes uıymdardyń qatysýymen talqylandy. Respýblıka boıynsha óńirlerde 2000-nan astam kezdesýler men pikir almasýlar uıymdastyryldy. Osylaısha memlekettik-konfessıalyq qatynastardyń qazaqstandyq modeliniń qalyptasýy barysynda jan-jaqty syndarly seriktestik ornyǵýda»- dedi Berik Aryn.

Ótken jyly Mınıstrlik QMDB-men birlesip, «Ýaqyp» qaıyrymdylyq qoryn qurǵan bolatyn. Qor shalǵaı aýdandarda turatyn, materıaldyq jaǵynan muqtaj 300-den astam din qyzmetkerine kómek kórsetti. Sondaı-aq, joba boıynsha Aqtóbe oblysyndaǵy 24 ımamǵa stependıa berilýde. «Ýaqyp» qory arqyly Aqtóbe oblystyq ortalyq meshitine kólik alyp berildi jáne Aqtóbe qalasynda halyqtyń áleýmettik osal tobyna arnalǵan 4 qabatty turǵyn úıdiń qurylysy josparlanyp otyr.

Jumys sapary aıasynda vıse-mınıstr Berik Aryn oblystyń birqatar áleýmettik nysandaryn aralady. Atap aıtqanda Bestamaq kentindegi dinı baǵytta bilim beretin «Aqtóbe medrese» kolejine, Tahaýı Ahtanov atyndaǵy oblystyq drama teatryna bardy. Óńir ımamdarymen kezdesti. Sondaı-aq vıse-mınıstrge oblystyq din isteri basqarmasy janyndaǵy «Ańsar» aqparattyq taldaý ortalyǵynyń jáne «oblystaǵy dinı ahýal  kartasy» aqparattyq júıesiniń  jumysy tanystyryldy.