Mınıstrdiń aıtýynsha, el aýmaǵy boıynsha byltyr 600 shaqyrymnan astam respýblıkalyq mańyzy bar jol iske qosylǵan. Al bıyl 528 shaqyrym joldy paıdalanýǵa berý josparlanyp otyr.

«Jol boıynsha jıyrmadan astam iri jobalarmen jumys istep jatyrmyz. Bul jobalar Qazaqstan óńirleriniń barlyǵyn derlik, shyǵysty, batysty, ortalyqty jáne basqa da aımaqtardy qamtıtyn bolady», — dedi ol. 

Jalpy, aldaǵy 3-4 jyldyń ishinde respýblıkalyq mańyzy bar joldardyń 4 myń shaqyrymnan astamy jóndeletin bolady. Olarda jyl saıyn 100 myńǵa jýyq jumys oryndary ashylmaq.

«Sondyqtan osy jobalardyń bizdiń ekonomıkamyzǵa áseri zor, mańyzy joǵary bolmaq», — dedi J. Qasymbek.

Mınıstr aldaǵy ýaqytta engiziletin aqyly joldarǵa da toqtaldy.

«Biz Astana – Temirtaý, Qapshaǵaı – Almaty jáne Almaty – Qorǵas joldaryn pılottyq rejımde aqyly etpek boldyq, bul jumystardy birinshi toqsanda bastaýǵa nıetti edik. Biraq tehnıkalyq máseleler týyndaýyna baılanysty keıinge qaldyrdyq. Birinshi toqsanda qurylys-montajdaý jumystaryn aıaqtap, ekinshi toqsanda pılottyq rejımde jumysyn bastaımyz», — dedi J. Qasymbek. 

Investısıalar jáne damý mınıstrligi bul joldar bıylǵy jyldyń maýsym aıynda tolyq stasıonarlyq aqyly rejımge kóshedi dep josparlap otyr. Atap aıtqanda, osy úsh jol ýchaskesi — Almaty – Qorǵas joly, Almaty – Qapshaǵaı jáne Astanadan Temirtaýǵa deıingi jol aqyly bolmaq.

«Búgingi tańda tek bir jol ǵana aqyly rejımde jumys istep tur, ol — Astana –Shýchınsk joly», — dedi sala basshysy. 

Jalpy, 2020 jylǵa deıin aqyly joldardy 6,5 myń shaqyrymǵa deıin jetkizý josparlanyp otyr. Ol shamamen jylyna 30 mlrd teńge tabys ákeledi. 

Sonymen qatar, 5,5 shaqyrym jol úshin memlekettik-jekeshelik seriktestik tetikterin paıdalaný arqyly iske asyrý qarastyrylǵan. Bıylǵy jyldyń ekinshi jartysynda memlekettik-jekeshelik áriptestik kelisimsharty jasalady.

«Tıisti konkýrs ótkizildi. Aǵymdaǵy jyldyń aıaǵyna deıin, bálkim, birinshi jartyjyldyqta MJÁ kelisimshartyna qol qoıamyz dep otyrmyz», — dedi J. Qasymbek.